नेपालगंज् हाकनं ७म्हेसिके कोरोना संक्रमण खनेदत
विकाश | बछलाथ्व त्रयोदशी ११४०
थौं सुथंनिसें हे बाँकेया नेपालगञ्जय् थप न्हयम्हेसिके कोरोना संक्रमित पुष्टि जूगु दु ।
न्हूपिं न्हयम्हं हे संक्रमित बाँकेया नेपालगञ्ज उपमहानगरपालिका वडा ८ यापिं खःगु स्वास्थ्य तथा जनसंख्या मन्त्रालयं न्ह्यथंगु दु ।
स्वास्थ्य मन्त्रालयया सहप्रवक्ता समिर कुमार अधिकारीया कथं भेरी अस्पताल नेपालगञ्जय् याःगु परीक्षणय् प्यम्ह मिसा व स्वम्ह मिजंयाके संक्रमण पुष्टि जूगु खः ।
थौं संक्रमण पुष्टि जूपिंलय् ३२दँ, ३४दँ व ५५दँया मिसा अले २२दँ, ३०दँ व ४०दँया मिजंलिसें ९दँया मिसामचा तकं दु ।
थौं संक्रमित पुष्टि जूपिं सकसिगु स्वास्थ्य अवस्था सामान्य दुगु व चिकित्सकया निगरानीइ दुगु धाःगु दु ।
थौं बाँकेय् ७म्हेसिके संक्रमण पुष्टि जूगुलिसें नेपालय् कोरोना भाइरसपाखें संक्रमितया ल्याः ८२म्ह थ्यंगु दु । व मध्ये १६म्ह वासः यायेधुंकाः ल्वय् लंकाः छेँय् लिहां वनेधुंकूगु दु ।
नेपालगन्जय् खनेदुपिं संक्रमितया कन्ट्याक्ट ट्रेसिङ्ग व स्वाब संकलन थौंनिसें हे न्ह्याइगु जूगु दु ।
आइतबाः जक हे बाँकेय् छन्हुं हे १५म्हेसिे संक्रमण पुष्टि जूगु खः ।
उपिं सकलें वंगु शुक्रबाः संक्रमण पुष्टि जूम्ह ५८दँया मिजंया जःलाखला व वया स्वापुतिइ वःपिं खः ।
नेपालगन्जय् जक हे कोरोना संक्रमितया ल्याः २३म्ह थ्यंगु दु ।
Categorized in राष्ट्रिय
