नेपालगञ्जय् एकीकृत जाँच चौकी (आइसीपी) या शिलान्यास

नेपालगञ्जय् एकीकृत जाँच चौकी (आइसीपी) या शिलान्यास शहरी विकासमन्त्री कृष्णगोपाल श्रेष्ठ व भारतीय वाणिज्य तथा उद्योग मन्त्री पियुष गोयलं नेपालगञ्जय् एकीकृत जाँच चौकी (आइसीपी) या शिलान्यास यानादिगु दु। भारतीय सरकारया ग्वाहालि निर्माण जुइ त्यःगु एकिकृत जाच चौकीया भुमी पुजा व शिलान्यास ज्याझ्वलया मूपाहाँ मन्त्री श्रेष्ठं भन्सार तथा अध्यागमन सुविधायात छगु हे कुसाया क्वय् हया निगु देय् या दथुइ मालबाहक सवारी साधनया आवतजावतयात व्यवस्थित यायेत महत्वपुर्ण जुइ धका धयादिगु दु।

कोरोना महामारीया कारण नेपालगंज वने मफुगुलि भर्चुअल रुपं शिलान्यास याःगु खः। उगु इलय् भुमी पुजा याःगु खः। नेपालगंजय् ग्वसाः ग्वःगु भुमिपुजा ज्याझ्वलय् मन्त्री श्रेष्ठं नेपाल व भारत दथुइया सम्बन्ध थप मजबुत जुया वनेइगु धइगु भलसा कयादिगु खः। वयकलं सन् २००५ निसे शुरु जूगु परियोजनां निगु देय् दथुइ आर्थिक विकासय् थ्यःगु दु धका धयादिगु खः। वयकलं प्यंगु मध्ये निगु एकिकृत जाच चौकी निर्माण सम्पन्न जुइ धुकुगु व निगु निर्माण यायेगु झ्वलय् दु। निगु हे सरकारं क्वछिगु इलय् सम्पन्न जुइगु लक्ष्य कयातःगु दु।

विशेष अतिथि कथं नयाँ दिल्लीपाखे चौकी सिलान्यास व भुमिपुजा अवलोकन यानदिम्हा शहरी विकास मन्त्रीया समकक्षी भारतीय वाणिज्य तथा उद्योग मन्त्री गोयलं नेपाल व भारतया सम्बन्ध यक्को महत्वपुर्ण दुगु धका धयादिगु खः। वयकलं झीगु सम्बन्ध विश्वया मेमेगु देय् स्वया फरक खः, दाजुकिजा थे खः। कोभिड महामारीया कारण थः नेपालगंज वया शिलान्यास यायेगु ज्याझ्वः रोके जुगु धका धयादिसे नेपाल वयेगु थःगु इच्छा पुरा मजुगु धका धयादिगु खः। मन्त्री गोयलं भारतं थप न्हुगु योजनाय् ग्वाहालि यायेत थीथी परियोजना तयार जुयाच्वंगु धका धयादिगु खः।

वयकलं भारतया आर्थिक ग्वाहालि नेपालया भैरहवाय् प्यःगु एकीकृत जाँच चौकीया निर्माण यायेगु घोषणा यानादिगु खः। आःतक कार्यान्वयनया मोडालिटी व परियोजनाया कार्यान्वयन यायेगु निकायया विषय धाःसा विचाराधीन अवस्थाय् दु। थ्व स्वया न्ह्यः वीरगंज व बिराटनगरय् दयेकूगु निर्मित एकीकृत जाँच चौकीया निर्माण सम्पन्न याना सन् २०१८ या अप्रिल व सन् २०२० या जनवरी तक मंकाः कथं उलेज्या जुइ धुकुगु दु। योजना कथं आः नेपालगंज व भैरहवाय् चौकी निर्माणया झ्वलय् दु। नेपालगंज परियोजनाय् राइट्स इन्टरनेशनल लिमिटेडया सुपरिवेक्षणय् पुणेया राजदीप बिल्डकन प्राइभेट लिमिटेड नांया भारतीय कम्पनीं याये त्यःगु खः।

शहरी विकास मन्त्रालयय् ग्वसाः ग्वःगु भर्चुअल ज्याझ्वलय् शहरी विकास राज्यमन्त्री रामवीर मानन्धर, नेपालया लागि भारतीय राजदूत  विनय मोहन क्वात्रा, शहरी विकास मन्त्रालयया सचिव डा. रमेश प्रसाद सिंह न दुगु खः । 

Categorized in राजनीति