नेपालगञ्जय् २५ गते तक निषेधित क्षेत्र घोषणा
लहनान्युज | बछलाथ्व त्रयोदशी ११४०, बैसाख २३ मंगलवाः
कोरोना संक्रमित ल्याः लगातार अप्वोया वःगुलि बाँकेया नेपालगन्जय् थौं न निषेधित क्षेत्र घोषणा यायेगु निर्णय याःगु दु ।
जिल्ला प्रशासन कार्यालयय् च्वंगु उगु सर्वदलीय व सर्वपक्षीय बैठकं मंगलवाः सुथय् ११ बजे निसे २५ गते तक नेपालगञ्जय् पूर्णतः निषेधित क्षेत्र घोषणा याःगु ।
संघीय सरकारं जारी याःगु लकडाउन नाप नेपालगन्ज उपमहानगरपालिकाय् वैशाख २३ गते बिहान ११ बजे निसे २५ गते चान्ह्य तक पूर्ण निषेधित क्षेत्र घोषणा यायेगु धका प्रमुख जिल्ला अधिकारी कुमार बहादुर खड्कां धयादिगु दु ।
थुगु इलय् नेपालगन्जय् वास बाहेक मेगु पसः चायेके दइ मखुगु यागु दु । बाँकेय् १६ म्हसित कोरोना संक्रमण पुष्टि जुगुलि प्रदेश ५ सरकारं स्वन्हु तक कर्फ्यु तयेत जिल्ला प्रशासनयात सुझाव बिःगु खः ।
नेपालगञ्जय् अन्सारी मस्जिदया ६० वर्षीय मौलानाय् वैशाख १९ गते कोरोना संक्रमण खने दुगु खः । वया लिपा व नाप स्वापू दुपि १५ म्हसित कोरोना संक्रमणया पुष्टी जुगु खः ।
संक्रमित दक्को बाँकेय् खजुराय् च्वपिन्त सुशील कोइराला क्यान्सर अस्पतालय् आइसोलेसनय् तया तःगु खः ।
