नेपालभाषा एकेडेमीया स्वंगु सफू पिदन

नेपालभाषाया साहित्य व संस्कृतिया ख्यलय् छगु प्राज्ञिक संस्था कथं निस्वनातःगु नेपालभाषा एकेडेमीपाखें स्वंगु सफू पिकागु दु । स्वंगु सफूया पिकाक एकेडेमीया संरक्षकया नं जुयादीम्ह वाङ्गमय शताब्दि पुरुष संस्कृतिविद्ध डा सत्यमोहन जोशीं मूपाहाँ कथं थौं शनिवाः छगु ज्याझ्वः दथुइ स्वंगु सफूया पितब्वज्या यानादीगु खः ।

 

मूपाहाँ शताब्दि पुरुष जोशीया निवास लोक साहित्य भवनय् जुगु उगु सफू पितब्वज्या ज्याझ्वलय् ग्वसाः खलः एकेडेमीया उप कुलपति एवं साहित्यकार यज्ञरत्न धाख्वाःया सभाध्यक्षताय् जुगु खः । 

 

थौं जुगु पितब्वज्या ज्याझ्वलय् ग्वसाः खलः नेपालभाषा एकेडेमीया खुला पौ नेवाः प्रज्ञाया प्यंगुगु ल्याः न साहित्यकार यज्ञरत्न धाख्वाःया बाखं मुना सफू चं अजि व समालोचक प्रा डा चन्द्रमान बज्राचार्यया च्वसु मुना सफू ल्हाःचिं या पितब्वज्या जुगु खः ।
 
स्वंगु सफुया पिकाकः नेपालभाषा एकेडेमीया प्राज्ञ दुजः मयजु शशीकला मानन्धरं न्ह्याकादीगु उगु पितब्वज्या ज्याझ्वलय् एकेडेमीया मेम्ह प्राज्ञ दुजः विजयरत्न असंबरें लसकुस न्वचु बियादीगु खःसा ज्याझ्वलय् मूपाहाँ शताब्दि पुरुष जोशीं नेपालभाषाया साहित्य नं विश्वया छुं नं देय् व भाय्या साहित्य सिबें मजु धका धयादिलसा नेवाः साहित्ययात नं विश्वया मेमेगु भासं भाय् हिला विश्व साहित्य ख्यलय् थ्यंके लिबाय् धुंकल धका धयादिगु खः ।
 
ज्याझ्वःया सभापति एवं थौं पिदंगु बाखं मुना सफूया च्वमि साहित्यकार धाख्वाः नं अंग्रेजी भासं मोडर्न शर्ट स्टोरी धका धाइगु झीसं चिबाखं धया वया च्वनागु छगु हे मखु धका धासे बाखंया परिभाषा न्ह्यागु हे जूसां मू खँ धइगु बाखं च्वयेगु हे खः धका धयादिल । थों हे पिदंगु सफूया मेम्ह छम्ह च्वमि डा बज्राचार्यं साहितयया थीथी सिद्दान्तयाबारे चर्चा यानादिल ।
 
ज्याझ्वलय् शताब्दि पुरुष जोशीया निवास स्थानय् दयेका च्वंगु लोक साहित्य भवन निर्माणय् ग्वाहालि जुइ कथं समाजसेवी मोतिलाल शिल्पकारं ५१ द्वः तका व साहित्यकार एवं नेपालभाषा एकेडेमीया उप कुलपति यज्ञरत्न धाख्वाःं छगु लखं तका ग्वाहालि कथं लःल्हानादिल ।