नेपालभाषा पाठ्यक्रम ब्वंकेगु नितिं विज्ञपिंलिसे सहलह
नृपेन्द्रलाल श्रेष्ठ | दिल्लाथ्व अष्टमी ११४०, असार १४ आइतवाः
येँ महानगर दुनेया ब्बनेकुथिइ नेपालभाषां स्थानीय पाठ्यक्रमय् ब्वंकेगु नितिं अन्तिम रुप बिइत वंगु आइतवाः¬ राष्ट्रिय सभागृहस बिज्ञपिंलिसे सहलह याःगु दु । थुगु सफू येँ महानगर दुने छगू तगिंनिसें च्यागू तगिंतक दक्व ब्बनेकुथिइ लागु जुइ । थुगु सफू सामुदायिक व निजी ब्वनेकुथी ब्वंकीगु जानकारी ब्यूगु दु ।
ज्याझ्वलय् येँ महानगरपालिकाया उप–प्रमुख हरिप्रभा खड्गी श्रेष्ठ, शिक्षा बिभागया मोतिराज खनाल, गुजेश्वरी श्रेष्ठ, येँ महानगरपालिकाया प्रवक्ता ईश्वरमान डंगोल, मुकुन्द रिजालपिन्सं नुगःखँ तयादीगु खः ।
ज्याझ्वलय् प्रा.डा. त्रिरत्न मानन्धर, सह–प्राध्यापक राजन लाल जोशीलिसेंया ब्यक्तित्वपिन्सं तयादीगु न्ह्यसःया लिसः पाठ्यक्रम निमार्ण समितिया संयोजक प्रा.डा. चुन्दा बज्राचार्यं बियादीगु खः ।
उगु सफुतिइ येँ देय् म्हसिकेगुकथं येँया तजिलजि, येँ महानगर दुनेया सम्पदालिसें भाषा, नखःचखः, संस्कार, सीप कलाकौशल व ब्यवसाय, नैतिक शिक्षा, भौगोलिक स्वरुप व प्राकृतिक स्वरुप, स्वास्थ्य, शारीरिक व प्राकृतिक स्वरुप, ब्यक्ति म्हसीका व लिपि दुथ्याकातःगु दु ।
उगु पाठ्यक्रमया बारे कमितिया दुजः बरुणप्रसाद बैद्य न्ह्यब्बयादिगु खः ।
येँ महानगरपालिकां नेपालभाषाया पाठ्यक्रम दयेकेगु लागि प्रा.डा. चुन्दा बज्राचार्यया संयोजकत्वय् मोतिराज खनाल सदस्य सचिव व दुपि बरुणप्रसाद बैद्य, नरेशबीर शाक्य व मदनरत्न मानन्धर दुगु नेपालभाषाया पाठ्यक्रम निमार्ण कमिति वःगु २०७६ भाद्र महिनाय् गठन याःगु खः । थुगु कमितिं मंसिर महिना ज्या न्ह्याकूगु खः ।
