नेपालभाषा म्यूजिक भिडियो अवार्डया टपटेन सार्वजनिक
शोभा श्रेष्ठ | थिंलाथ्व तृतीया ११४०
दक्कले आपाः विधाय् अवार्ड बीत्यंगु ‘नेपालभाषा स्टार म्यूजिक भिडियो अवार्ड २०१९’या टप टेन सार्वजनिक जूगु दु । ग्वसाः खलः संसार क्रिएशनं थौं यलय् ज्याझ्वः यानाः टप टेन सार्वजनिक याःगु खः ।
ज्याझ्वलय् टप टेनय् दुथ्याःपिं कलाकार व प्राविधिकतयत दसिपौ व मेडल लःल्हात ।
अवार्डया थीथी विधा दुने उत्कृष्ट म्येहालामि मिजं, उत्कृष्ट म्येहालामि मिसा, नवोदित म्येहालामि मिजं, नवोदित म्येहालामि मिसा, लयचिनामि, म्येच्वमि, संगीत संयोजक दुथ्याः ।
व हे कथं, भिडियोपाखे उत्कृष्ट मोडल मिजं, उत्कृष्ट मोडल मिसा, भिज्युअल एडिटर, क्यामेरा पर्सन, समाः, भिडियो रंग समिश्रण, उत्कृष्ट म्यूजिक भिडियो, भेषभूषा, रेकर्डिङ्ग कक्ष, उत्कृष्ट नृत्य निर्देशक विधा नं दुथ्याकूगु दु ।
थुगु हे अवार्डया फाइनल ज्याझ्वलय् जन संगीत स्रष्टा अमरराज शर्मायात लाइफटाइम अचिभमेन्ट अवार्ड बीगु जूगु दु ।
राइजिंग स्टार सिंगिंगय् मनोनित उत्कृष्ट न्यागू नेपालभाषा म्यूजिक भिडियोया हालामिपिन्त नं ज्याझ्वलय् दसिपौ व मेडल लःल्हाःगु खः ।
दक्वं विधाय् मनोनयनय् लाःपिं कलाकार व प्राविधिकतयत खल्ती अथवा स्पायरोपाखें भोटिंग यायेफइगु ग्वसाः खलकं धाःगु दु ।
ज्याझ्वलय् वरिष्ठ जनसंगीत स्रष्टा अमरराज शर्मा, अभिनेत्री हिसिला महर्जन, वरिष्ठ म्येहालामि जुजुकाजी रंजीत, वरिष्ठ तबला वादक लिसें संगीतकार मनराजा नकर्मी, वरिष्ठ फोटोग्राफर राजभाई सुवाल, वरिष्ठ सिने पत्रकार विजयरत्न असंबरे, न्हापांम्ह आदिवासी नायः जय श्रेष्ठ, यल महानगरपालिका १६ वडाध्यक्ष लिसें म्येच्वमि निर्मलरत्न शाक्यलिसेंया उपस्थिती दुगु खः ।
थुगु हे अवार्डया प्रचारप्रसारया नितिं वइगु मंसीर २८ गते शनिबाःकुन्हु ख्वनाया फुटबल मैदानय् आर्टिष्ट फुटबल म्याच नं जुइत्यंगु दु ।
