२०८० चैत्र १६, शुक्रबार

नेपालय् जलबायु परिवर्तया नकारात्मक लिच्वः : प्रम ओली

लहनान्यूज | ने.सं. ११३९ दिल्लाथ्व चतुर्दशि (१५ जुलाइ, २०१९), सोमवाः

प्रधानमन्त्री केपी शर्मा ओलीं नेपालय् जलबायु परिवर्तनया नकारात्मक लिच्वः लाःगु धयादीगु दु ।
 
 
बन तथा वातावरण मन्त्रालयया ग्वसालय् येँय् जूगु ‘जलवायु सम्बन्धि अन्तर्राष्ट्रिय गोष्ठी’या थौं सोमवाः उलेज्या यानादिसें प्रधानमन्त्री ओलीं उगु खँ धयादीगु खः । वय्कलं ग्रीन हाउस ग्यास उत्सर्जनय् नेपाःया भूमिका गौण जूसां नं नेपालं थुकिया नकारात्मक लिच्वः फयेमालाच्वंगु धयादिल ।
 
 
प्रधानमन्त्री ओलीं विश्वस्तरय् अप्वया वनाच्वंगु तापक्रम, ग्लेसियरया तह म्हो जुजुं वनाच्वंगु अवस्था व अस्वभाविक वा वःगुलिं जनजीवनय् गम्भीर व नकारात्मक लिच्वः लानाच्वंगु नं धयादिल । सरकारं दँय्दसं प्राकृतिक प्रकोप व्यवस्थापन यायेत तःधंगु ल्याखय् श्रोतया व्यवस्था यायेगु यानाच्वंगु प्रधानमन्त्री ओलीया धापू दु ।
 
 
प्रधानमन्त्री ओलीं धयादिल, ‘झीगु संविधानया धारा ३० सं स्वच्छ वातावरणय् म्वाय् दइगु नागरिकया आधारभूत अधिकारयात सुनिश्चित याःगु दु । थुगु धाराया पूवंक कार्यान्वयन यायेत सरकार प्रतिबद्ध दु ।’
Categorized in राजनीति