नेपाली एथलेटिक्स कासामी सरस्वती चौधरीया कासा थौं
दिल्लागा षष्ठी ११४१,साउन १५ शुक्रवाः
नेपालया एथलेटिक्स कासामि सरस्वती चौधरी जापानय् न्ह्यानाच्वंगु टोकियो ओलम्पिकया हिट चरणं हे पिहांवंगु दु ।
मिसा सच्छि मिटर ब्वाज्याय् थौं सुथय् धेंधें बल्लाः याःम्ह सरस्वतीं १२ दशमलव ९१ सेकेन्डय् रेस पूवंकल । थ्व धेंधें बल्लाखय् सरस्वतीं थःगु व्यक्तिगत उत्कृष्ट कासा तकं क्यनेमफुत । मिसा सच्छि मिटर ब्वाज्याय् सरस्वतीया उत्कृष्ट ई १२ दशमलव ५५ सेकेण्ड खः ।
थ्व विधाय् नेपाःया राष्ट्रिय कीर्तिमान देवीमाया पनेरुया नामय् १२ दशमलव २० सेकेन्डया दु । टोकियो ओलम्पिकया मिसा सच्छि मिटर ब्वाज्याय् सरस्वती निगूगु हिटया ९ कासामिमध्ये च्यागूगु थासय् लात । सरस्वतीया कासालिसें टोकियो ओलम्पिक्सय् नेपालया न्याम्ह कासामिया धेंधें बल्लाः क्वचाःगु दु ।
थुगुसी स्वीमिङया अलेक्स शाह व गौरिका सिंह अले सुटिङया कल्पना परियारं राष्ट्रिय कीर्तिमान दयेकूगु दु । जुडोया सोनिया भट्ट धाःसा न्हापांगु बाउटय् हे बुत ।
Categorized in कासा
