नेपाली कांग्रेसया केन्द्रीय महाधिवेशन लच्छि लिछ्याइगु
ञंलागा तृतीया ११४१, असोज ८ शुक्रवाः
नेपाली कांग्रेसया संस्थापन पक्षं केन्द्रीय महाधिवेशन लच्छि लिछ्यायेगु प्रस्ताव याःगु दु ।
म्हिगः सनिलय्च्वंगु पदाधिकारी व पूर्व पदाधिकारीपिनिगु मुँज्याय् महामन्त्री पूर्णबहादुर खड्कां मंसिर ७ निसें १३ गतेतक महाधिवेशन याये मलाइगु धयादीगु खः ।
म्हिगःया मुँज्या न्ह्यानाकथं पार्टीया सभापति शेरबहादुर देउवा मुँज्या जूगु थासं पिहाँझाःगु खः । देउवा पिहाँझायेवं उपसभापति विमलेन्द्र निधिया ब्वतिइ जूगु सहलह ज्याझ्वलय् खड्कां पुसय् केन्द्रीय महाधिवेशन यायेगु प्रस्ताव यानादीगु खः ।
क्रियाशील सदस्यता सार्वजनिक मजूगु हुनिं १३गू जिल्लाय् वडा अधिवेशन मजूनि । २०गू हिमाली जिल्लाय् मोहनि नखः न्ह्यः हे जिल्ला अधिवेशन यायेगु सहमति जूगु दु । मेमेगु थासय् मोहनि व स्वन्ति नखःदथुइ जुइ ।
महामन्त्री खड्कां प्रदेशया अधिवेशन छठ पर्वलिपा यायेगु प्रस्ताव यानादीगु दु । थुकिया तप्यंगु अर्थ, कांग्रेसया महाधिवेशन मंसिरया न्हापांगु वालय् यायेनु धइगु खः । जबकी पूर्व निर्धारित ज्याधलःकथं मंसीर ९ गते केन्द्रीय महाधिवेशन न्ह्याकेमाः ।
अथेजुयाः महामन्त्री खड्कां केन्द्रीय महाधिवेशन लच्छि लिचिइकाः पुस ९ निसें १३ गतेतक यायेगु प्रस्ताव यानादीगु खः । कांग्रेसं वंगु भदौ २३ गते न्ह्यः हे केन्द्रीय महाधिवेशन यायेधुंकेमाःगु खः ।
न्यादँया कार्यकाल पूवंकाः थप याःगु खुला धइगु भदौ २३ गते खः । व ई न पुलेधुंकूगु दु । केन्द्रीय महाधिवेशन याये मफयेवं कांग्रेसं भदौ १८ गते वडा अधिवेशन न्ह्याकाः उगू जानकारी निर्वाचन आयोगयात ब्यूगु खः ।
Categorized in राजनीति
