नेपाली कांग्रेसय् संस्थापन व पौडेल दथुइ सहमति
गुंलागा सप्तमी ११४१, भाद्र १३ आईतवाः
नेपाली कांग्रेसय् संस्थापन व रामचन्द्र पौडेल दथुइ सहमति जूगु लिसें क्वजिनातःगु मितिइ महाधिवेशन जुइगु संभावना अप्वःगु दु ।
पार्टी सभापति शेरबहादुर देउवा व वरिष्ठ नेता रामचन्द्र पक्ष दथुइ म्हिगः निर्वाचन निर्देशिका संशोधन, क्रियाशील दुजःतये नाँ धलः सार्वजनिक व उम्मेदवारतये मापदण्ड लिसेंया विषयलय् सहमति जूगु खः ।
अथेहे ६ द्वः ७ सः व ४३गू वडाय् छन्हुं हे अधिवेशन यायेगु सहमति नं जूगु दु । सहमति लिपा पार्टी मूख्यालयस छुं दिं थुखे जुयाच्वंगु जिल्ला सभापतितये रिले अनसन नं म्हिगः चान्हय्निसें त्वाथःगु दु ।
अथेहे म्हिगः चान्हय् तक्क ५३गू जिल्लाया क्रियाशील दुजःया नाँ सार्वजनिक जुइधुंकुगु दु । केन्द्रीय निर्वाचन समितिं निर्वाचन निर्देशिका कथं म्हिगः थप ५गू जिल्लाया नाँ धलः प्रकाशित याःगु खः ।
नुवाकोट, धादिङ, चितवन, यलः व अर्घाखाँचीया क्रियाशील दुजःया नाँ धलः सार्वजनिक जूगु निर्वाचन समितिया कजि महादेवप्रसाद यादवं जानकारी बियादील । वयेकया कथं क्रियाशील धलः सार्वजनिक जुइधुंकुगु जिल्लाय् निर्वाचन अधिकृत नं खटे जुइधुंकुगु दु ।
कांग्रेसं थ्वहे भदौ १८ गते देय्यंकया वडा अधिवेशन यायेगु धाःगु दु । कांग्रेसयात भदौ २३ दुने हे वडा अधिवेशन यायेमाःगु बाध्यता दु । वयांलिपा अधिवेशन न्ह्याबलय् वैधानिकताया न्ह्यसः ब्वलंगुलिं कांग्रेसं भदौ १८ य् हे वडा अभिवेशन यायेत्यंगु खः । कांग्रेसया केन्द्रीय महाधिवेशन धाःसा मंसिर ९ निसें १३ गते तक्क येँय् जुइत्यंगु दु ।
कांग्रेसय् थ्वखुसिइ ९ गू लख सिवें अप्वः क्रियाशील दुजः दु । क्रियाशील दुजःया धलःखय् जिल्ला सभापतिया हे नाँ मलूगु कुँँख्यना तकं वःगु दु ।
Categorized in राजनीति
