नेपाली कांग्रेस केन्द्रीय कार्यसमिति मुँज्या थौं नं च्वनिगु
बछलाथ्व अष्टमी ११४१,असार ४ शुक्रवाः
नेपाली कांग्रेसया केन्द्रिय कार्यसमितिया मुँज्या थौं नं च्वनेत्यंगु दु ।
म्हिगः न्ह्यागु मुँज्याय् पार्टीया आसन्न १४क्वःगु महाधिवेसन, खुसिबाः चलः थेंज्यागु प्राकृतिक विपद् लिसें देय्या लिपांगु राजनीतिक अवस्थाया खँय् सहलह जुयाच्वंगु दु । मुँज्यां पार्टीया महाधिवेशन ज्याधलःखय् संशोधन यायेगु तयारी याःगु नेतातयेसं धाःग्ु दु । कांग्रेसया सहमहामन्त्री प्रकाशशरण महतया कथं कांग्रेसं क्वयेय्या तहया अधिवेशन वइगु साउन १२ गते निसें यायेगु याना मुँज्याय् सहलह जुयाच्वंगु दु ।
थ्वयान्ह्यः काँग्रेसया वंगु शनिबाः क्वचागु पदाधिकारी मुँज्यां साउन ६ गते निसें वडा तहपाखें अधिवेशन न्ह्याकेगु प्रस्ताव पारित याःगु खः । पार्टीया न्ह्यानाच्वंगु मुँज्यां उगु ज्याधलःयात ६ न्हू लिछ्यायेगु प्रस्ताव याःगु खः ।
अथेहे पालिका, जिल्ला व प्रदेशस्तरीय अधिवेशनया ज्याधलः नं सामान्य थुखेउखे यायेज्या जूगु धाःगु दु । तर केन्द्रीय अधिवेशन धाःसा पदाधीकारी निर्णय कथं भदौं १६ निसें १९ गतेया हे मितिइ यायेगु प्रस्ताव कार्यसमिति मुँज्याय् तःगु दु ।
थुखे, केन्द्रीय क्रियाशील सदस्यता छानविन समितिं असार ६ गते तक्कयात कृयाशील सदस्यता उपर उजुरी यायेगु ई निर्धारण याःगु दु । मुँज्यालिपा सञ्चारकर्मीतयेलिसे खँ ल्हासें समितिया कजि रमेश लेखकं थौंनिसे्ं हे क्रियाशील सदस्यताय् लाःगु उजुरी दुग्यंक स्वयेगु न्ह्याइगु धयादील । वयेकलं समितिया हुनिं महाधिवेसन मदिइगु नं दावी यानादील ।
थ्वयान्ह्यः वंगु फागुनय् ज्याधलदः संशोधन यासें कांग्रेसं भदौलय् महाधिवेसन यायेगु निर्णय याःगु खः । उगु ज्याधलःया कथं असार ५ गतेनिसें वडा अधिवेसन न्ह्याकेमाःगु बाध्यताय् पार्टी दूगु खः । पार्टीं फुक्क ज्यापहःयात लच्छि व केन्द्रीय महाधिवेसन ९ न्हूगु चिलेगु तयारी यानाच्वंगु दु । कृयाशील सदस्यता सच्छि व ६५गू निर्वाचन क्षेत्रपाखें इन्ट्री यायेमाःगु जूसा नं आःतक्क सच्छि व ४९ गू थाय्या जक इन्ट्री जूगु दु ।
