नेपाली भिक्षुयात थाइल्याण्डय् पदवी
लहानान्युज | बछलागा पञ्चमी, ११४१, असार २५ शुक्रबाः
नेपाःया भिक्षु डा. सुगन्ध महास्थविरयात थाइल्यान्डया नरेश महा वालि रालङ्कनं राजकीय सम्मान बीगु निर्णय याःगु दु ।
थाइल्याण्डया राजसंस्था व थाई बौद्ध संघं भिक्षु सुगन्धयात अतिकं विशिष्ट धार्मिक महत्वं जाःगु ‘फ्रा धम्मा शाक्य वंशी वसुत’ पदवी बीगु निर्णय याःगु खः । दछि न्ह्यः प्यंगूगु तहया देवसमान ‘फ्रा देव शाक्य वंश पण्डित’ पदवी ब्यूगु खः ।
हलिंया बौद्ध जगतय् थ्वकथंया सम्मानयात अतिकं गौरवं जाःगु पदवी धयातःगु दु । थन्यागु उच्चकोटीया सम्मान चूलाकूम्ह वय्क न्हापांम्ह नेपामि भिक्षु जुयादी । डा. सुगन्ध महास्थविरया गृहस्थ नां अनिलमान शाक्य खः ।
वय्कलं प्यंगू दशकनिसें थाइल्यान्डय् च्वनाः बौद्ध धर्म व बुद्ध शासनय् योगदान बियादीगु दु । वय्क थाइल्याण्डया उत्तरी क्षेत्रीय गर्भनर तकं खः ।
थीथी बौद्ध विश्वविद्यालयस दुथ्याःम्ह भिक्षु डा. सुगन्ध थाइल्याण्डया नांजाःगु महामुकुट बौद्ध विश्वविद्यालयया डेपुटी रेक्टर तकं जुयादी ।
Categorized in राष्ट्रिय
