नेपाली राष्ट्रिय क्रिकेट टोली मेगु वालय् ओमान वनिगु
गुंलाथ्व द्धादशी ११४१, भाद्र ३ बिहीवाः
आइसिसी विश्वकप लिग–२ अन्तर्गत ओमान व अमेरिकालिसे जुइगु त्रिकोणात्मक क्रिकेट श्रृंखला म्हितेत नेपाली राष्ट्रिय क्रिकेट टोली मेगु वालय् ओमान वनेत्यंगु दु ।
ओमान वनिगु टोलीइ नेपाःया १७ म्ह कासामि दुथ्याइ । आः बन्द प्रशिक्षणय् दूपिं १९ कासामि मध्ये निम्ह लिपांगु धलःपाखें चिलेज्या जुइ । । थ्वहे शुक्रवाः तक्क लिपांगु टोलीया क्वजिइगु नेपाल क्रिकेट संघ क्यानं न्ह्यथंगु दु ।
नेपालं ओमान व अमेरिकालिसे त्रिकोणात्मक छगू दिवसिय श्रृंखला म्हितिइ । श्रृंखलाय् फुक्क टोलीं छखेरं मेखेरलिसे निगू निगू कासा म्हितिइ । त्रिकोणात्मक श्रृंखला न्ह्यः तयारीया नितिं नेपाल पपुवा न्युगिनी (पि.एन.जी) लिसे निगू एक दिवसिय कासा म्हितिइ ।
ओमानय् नेपाली टोलीया २४ घौ दुने छगू पिसिआर परिक्षण जुइ । कासामिया रिपोर्ट नेगेटिभ वःसा क्वारेनटाइन च्वनेमालिमखु । नेपाली टोलीं साउन ३गूगु वालंनिसें बन्द प्रशिक्षण यानाच्वंगु दु ।
क्यानं २०म्ह कासामियात बन्द प्रशिक्षणय् सःतूगुलिइ पूर्व कप्तान पारस खड्का सन्न्यासया हुनिं दुमथ्याः ।
Categorized in कासा
