डिफेन्सया कासामी रोहित चन्दं न्हापांगु हाफय् ह्याउँगु कार्ड नया पिहाँवने धुंका १०म्ह कासामी सीमित जूगु नेपालं अष्ट्रेलियाविरुद्ध ३०नां बुइमाःगु दु । थ्व हार लिपाः शुक्रबाः विश्वकप २०२२ छनोट कासाः क्वचाःगु दु । थ्वलिसें नेपाः एसियन कप २०२३ छनोटया स्वंगूगु थासय् लाइगु ह्वःता त्वफिउगु दु । आः उकिया लागि प्लेअफ म्हितेमाःगु दु । छनोटया ८गूमध्ये ६गू कासा बूगु नेपालं निगू कासा त्याका ६गू ल्या दयेकूगु दु । पुच बी’या प्यंगुगु थासय् लाःगु दु । नेपालं निगूलिं कासा चाइनिज ताइपेईविरुद्ध बुका हासिल याःगु खः । ताइपेइ पुचःया लिपांगु थासय् लाःगु देय् खः । पुचःया प्यंगूगु थासय् लाःगु ८गू टिमध्ये उत्कृष्ट प्यंगु देशं सिधै एसियन कप छनोटया स्वंगूगु वलय् म्हिते दई । तर छगू पुचः प्यंगु जक दूगुलिं प्यंगू थासय् लाःगुमध्ये उत्कृष्ट प्यंगू या छनोटय् न्यागूगु थासय् लाःगु टिमलिसेया नतिजा गणना जुइमखु । गुकियाना प्यंगूगु वरियता लाःगु नेपाल अंकविहीन जूगु खः । Categorized in कासा