नेपाल कम्युनिष्ट पार्टीया संस्थापक महासचिव पुष्पलालया ४३क्वःगु लुमन्ति दिवस
दिल्लाथ्व त्रयोदशी ११४१,साउन ७ बिहीवाः
नेपाल कम्युनिस्ट पार्टीया संस्थापक महासचिव पुष्पलाल श्रेष्ठया ४३क्वःगु लुमन्ति दिवस थौं हनाच्वंगु दु ।
नेपाली क्रान्तिया सिद्धान्तकारया रूपं म्हस्यूम्ह पुष्पलालं थःगु जीवंकाःछि नागरिकया स्वतन्त्रताया लागिं संघर्ष यानादिल । पुष्पलालं विसं २००६ वैशाख १० गते नरबहादुर कर्माचार्य, निरञ्जनगोविन्द वैद्य, नारायणविलास जोशी, मोतीदेवी श्रेष्ठलिसे जानाः नेपाल कम्युनिष्ट पार्टीया स्थापना यानाद्यूगु खः ।
नेपालय् कम्युनिष्ट पार्टीमार्फत जनताया पक्षय् अधिकार स्थापित यायेगु आज्जुलिसें वय्कलं कम्युनिष्ट पार्टी स्थापना यानादीगु खः । वय्कलं स्थापना यानादीगु नेकपा थीथी चरणय् ब्वदलाः थीथी कम्युनिष्ट पार्टी जूगु दु ।
वय्कलं विश्व कम्युनिस्ट घोषणा पत्रयात २००५ सालय् नेपालीइ भाय् हिलाः पिथनादिल । जुजुं ०१७ पुस १ गते प्रजातन्त्र लाकाकायेधुंकाः पुष्पलालं ताः ई भूमिगत व निर्वासित जीवन हनादिल । व धुंकाः पुष्पलालं ०२५ सालय् पञ्चायती निरंकुशताया अन्त्यया लागिं ‘संयुक्त जनआन्दोलनया कार्यदिशा’ न्ह्यःने हयादीगु खः ।
विसं १९८१ असार १५य् रामेछापया भँगेरीइ बूम्ह पुष्पलाल २०३५ साल साउन ७ गते वासः यायेगु झ्वलय् भारतय् मदुगु खः । थ्व हे दथुइ, पुष्पलालया लुमन्तिइ येँ व रामेछापय् नं थौं थीथी ज्याझ्वःया ग्वसाः ग्वःगु दु ।
Categorized in राष्ट्रिय
