नेपाल जोर्डनलिसे ३–० गोल अन्तरं बुत
लहनान्यूज | कछलागा त्रयादशी ११४१, जेठ २५ गते मंगलबाः
फिफा विश्वकप–२०२२ व एसियन कप–२०२३ अन्तर्गत निगूगु झ्वःया छनोटय् नेपाल जोर्डनलिसे बइमाःगु दु । कुवेतय् म्हिगः बहनि जूगु कासाय् नेपाल जोर्डनलिसे ३–० गोल अन्तरं बूगु खः ।
जोर्डनयात त्याकेत बाहा फाइजल सिफं दिगू व याजन अल अरबं छगोल यात । कुवेत सिटीया जाबेर अल अहमद अन्तर्राष्ट्रिय स्टेडियमय् जूगु कासाया २४गू मिनेटय् बाहा फाइजलं पेनाल्टी पाखें गोल याना जोडर्नयात न्ह्यनेत लाकेत ताःलात ।
अथेहे कासाया ४९गू मिनेटय् बाहा फाइजलं याक प्रयासं निगूगु गोल याना २–० नां न्ह्यने लाकल । फाइजलया फ्रिकिकं बाँलागु गोल याःगु दु । वयांलिपाः ६७गू मिनेटय् डिफेन्डर याजनं हेडपाखें गोल याना जोडर्नयात ३–० नां त्याकल ।
थ्वलिसें जोर्डनं नेपालविरुद्ध लगातार निगूगु कासा त्याकूगु दु । ल्यज्या अन्तर्गत वंगु दँय् अक्टोबरय् घरेलु मैदानय् जोर्डनं नेपाःयात ३–० गोलं हे बुकूगु खः । कासा त्याकूगुनाप पुचः ‘बी’ या जोर्डनं ६गू कासापाखें १३गू ल्या दयेकूगु दु ।
जोर्डन ल्याधलःया निगूगु थासय् दु । नेपालं न्हेगु कासां खुगु ल्याः तंगु खः । नेपाः प्यगूगु थासय् लानाच्वंगु दु । आः नेपालं पुचःया लिपांगु कासा अष्ट्रेलियालिसे म्हितिइ । नेपाः व अष्ट्रेलिया दथुया कासा शुक्रबाः जुई ।
नेपाःयात एसियन कप छनोटया निगूगु झ्वलय् थाय् दयेकेत अष्ट्रेलियालिसेया कासा त्याहे माःगु दु ।
