नेपाल त्यात
नेपाली मिसातयगु राष्ट्रिय क्रिकेट टिमं आईसीसी मिसा विश्वकप २०१७ या एसियाली ल्यज्या कासाय् थौं हङकङयात बुकाब्यूगु दु ।
 
कउलुन क्रिकेट क्लबय् ख्यलय् जूगु कासाय् नेपाली मिसातयगु पुचलं ७६ रनया आज्जु ज्वनाः ख्यलय् वःगु हङकङया मिसातयत १७.४ ओभरय् ६९ रन जक दयेकेबियाः अलआउट यानाबिल । व स्वयां न्ह्यः नेपाली मिसातयसं टस त्याकाः न्हापां ब्याटिङ यासें २० ओभर पूवंक हे म्हिताः ८ विकेटया क्षतिइ ७५ रन दयेकूगु खः । 
 
नेपाल व हङकङ दथुइया न्हापांगु कासाय् नेपाल बूगु खः । तर थौंया कासा त्याकाः नेपालं न्हापा बुइमाःगुया ब्वला सालाः थःगु निगूगु जीत नं दर्ता यानाः ग्लोबल क्वालिफायरय् म्हितेगु सम्भावनायात ल्यंकल । 
 
डबल लिगया लिधंसाय् म्हितकीगु कासाय् एसियाय् शीर्षस्थानय् लाइगु टिमं विश्वव्यापी ल्यज्याय् म्हितेगु व्हःताः चूलाकी । 
 
आः नेपालं शुक्रबार थाइल्यान्ड व शनिबार चीनलिसे म्हिती ।
 
 
  • थौंया कासा गथे जुल 
 
 
करुणा भण्डारीया अलराउन्ड ब्वज्या लिसें नेपालं हङकङ यायेत बुकेत ताःलाःगु खः । ब्याटिङ यायेगु झ्वलय् भण्डारीं २७ बलय् नेपालया नितिं दक्कले आपाः नटआउट १९ रनया योगदान बिल । 
 
बलिङया झ्वलय् ४ ओभरया स्पेलय् १७ रन बियाः ३ विकेट नं काःगु खः । वयकः वुमेन अफ दि म्याच घोषित् जुल ।
Categorized in कासा