नेपाली राष्ट्रिय फुटबल टिमं थौं मरिससविरुद्ध निगूगु अन्तर्राष्ट्रिय कासा म्हितेत्यंगु दु ।

कासा सनिलया ५ताः इलय् दशरथ रंगशालाय् जुइ । वंगु शनिबाः जूगु न्हापांगु कासाय् मरिससयात १–० गोलं बुकूगु नेपाल थौं निगूगु कासा नं त्याकेगु ताकय् दु ।

तर मरिसस नं थौंया कासा त्याकाः निगू कासाया मैत्रिपूर्ण श्रृंखला ज्वलिंज्वः यायेत स्वयाच्वंगु दु । थौंया कासाया लागिं नेपाली टोलीइ छुं ह्यूपाः हःगु दु ।

थ्वयां न्ह्यः, घोषित टिमय् दुम्ह अनन्त तामाङ व प्रशान्त अवस्थीयात चीकूगु दु । मुख्य प्रशिक्षक अबदुल्लाह अलमुताइरीं उमिगु थासय् दर्शन गुरुङ व मनिष डाँगीयात टिमय् दुथ्याकूगु दु ।

न्हापांगु कासाय् विमल घर्ती मगर, जगजित श्रेष्ठ व देवेन्द्र तामाङं राष्ट्रिय टिमय् पुनरागमन याःबलय् सुदिप गुरुङ व आकाश बुढा मगरं डेब्यु याःगु खः ।

Categorized in कासा