साफ अण्डर नाइन्टीन मिसा फुटबल च्याम्पियनसीपया निगूगु कासाय् नेपालं थौं श्रीलंकानाप धेंधेंबल्ला यायेत्यंगु दु ।

बंगलादेशया ढाकास्थित मुस्तोफा कमल स्टेडियमय् नेपाः व श्रीलंकादथुइया कासा थौं न्हिनय् जःछिपाः ३ताः ईलय् न्ह्याइ । न्हापांगु कासाय् नेपालं उपाधिया दाबेदार बंगलादेशलिसे गोलरहित ज्वलिंज्वः कासा म्हितूगु खः ।

नेपाः छगू कासापाखें छगू हे ल्या मुंकाः धलःया प्यंगूगु थासय् दु । श्रीलंकाया आःतक ल्या हे मरुनि । श्रीलंकां २गू कासा म्हिताः न ल्या मुंके मफुनि ।

च्याम्पियनसीपया स्वंगूगु कासाय् नेपालं भुटानविरुद्ध डिसेम्बर १७ तारिख अले लिपांगु कासा भारतविरुद्ध डिसेम्बर १९ तारिखय् म्हिती । राउन्ड रोबिनया लिधंसाय् न्ह्याइगु च्याम्पियनसीपय् न्यागू पुचःया ब्वति दु ।

शीर्ष निगू पुचः फाइनलय् दुहाँवनि । फाइनल कासा डिसेम्बर २१ तारिखय् जुइ

Categorized in कासा