नेपाल हङकङलिसे म्हिताच्वन
लहनान्यूज सम्वाददाता | कौलाथ्व द्वादशि ११३६ (अक्टोबर १३ २०१६)
मिसा विश्वकप क्रिकेटया एशियन लागाया ल्यज्या कासाया झ्वलय् आः नेपालं हङकङलिसे म्हिताच्वंगु दु ।
हङकङया कोउलुन क्रिकेट क्लबया ख्यलय् जुयाच्वंगु कासाय् नेपालं मुक्कं ७५ रन दयेकाः थःगु बायटिङ क्वचायेकूगु दु । टस त्याकाः बायटिङ यायेगु ल्यःगु नेपालं मुक्कं २० ओभर म्हिताः ८ विकेटया क्षतिइ ७५ रन दयेकूगु खः ।
नेपाःया नितिं दक्कले आपाः करुणां भण्डारीं १९ रन दयेकूगु खः ।
हङकङं कासा त्याकेत ७६ रनया आज्जु उलि थाकूगु धाःसा मखु । नेपालयात मेगु झ्वलय् वनेत थौंया कासा त्याके हे माःगु दबाब दु । तर नेपालं थौंया कासा त्याकेत थःगु बलिङ तसकं क्वात्तुकेमाःगु खनेदु ।
नेपालया लिसें ग्वसाः खलः देय् हङकङ, थाइलायन्ड व चीन दुथ्याःगु पुचलय् दक्वं पुचलं थवंथवय् निगू निगू कासा म्हितेमाः । उकिया झ्वलय् नेपाल न्हापांगु कासाय् हङकङलिसे व निगूगु कासाय् थाइलाय्न्डलिसे बुइधुंकूगु दुसा चीनलिसे जक त्याःगु दु ।
Categorized in कासा
