नेवाःतय्गु पहिचान हे मदया वनीगु खःला ?
जुजुमान महर्जन
नेपाल संघीय संरचनाय् वनेधुंकाः थुकिया अभ्यास नं शुरु जूगु दु, प्रदेशसभाया चुनावपाखें । आः प्रत्येक प्रदेशय् मुख्यमन्त्रीया नितिं संसदीय दलया नेता ल्यय्गु ज्या नं न्ह्याःगु दुसा अप्वः धइथे प्रदेशय् नेपाली कांग्रेस, नेकपा एमाले, नेकपा माओवादी केन्द्रलिसें संघीय समाजवादी फोरम, राष्ट्रिय जनता पार्टीपाखें संसदीय दलया नेता ल्यय्गु ज्या जुइधुंकूगु दु । गनं निर्विरोध निर्वाचित जूगु दुसा गनं चुनावपाखें नेता ल्यय्गु ज्या क्वचाःगु दु ।
थ्व हे झ्वलय् प्रदेश नं. ३ य् नं नेकपा एमाले पार्टीइ संसदीय दलया नेता ल्यय्गु ज्या जुल, चुनावपाखें । तर अजूचायापूगु लिच्वः वल । छाय्धाःसा भावी मुख्यमन्त्रीकथं बय्बय् जूम्ह अले इतिहासय् हे न्हापांखुसी न्हापांम्ह मुख्यमन्त्री मिसाम्ह जुइ धइगुकथं प्रचारप्रसारय् वःम्ह पार्टीया उपाध्यक्ष नापं पुलांम्ह मन्त्री तकं जुयादीम्ह अष्टलक्ष्मी शाक्य बूगु खः । आः प्रदेश नं. ३ या भावी मुख्यमन्त्री नेवाः नं मखु, अले मिसाम्ह नं मखु, छम्ह खस बर्मू हे जुइगु निश्चित जूगु दु ।
मुख्य मन्त्रीया नितिं एमाले पार्टी दुने धादिङ्गया राजेन्द्र पाण्डे व उपाध्यक्ष अष्टलक्ष्मी शाक्य दथुइ चर्चा परिचर्चा जुयाच्वंगु खः । थ्व इलय् अष्टलक्ष्मी हे मुख्यमन्त्रीया दावेदारकथं कयातःगु दु । थ्यं मथ्यं अप्वः धइथे निश्चित हे जुइ धुंकूगु धाःसा मपाःगु अवस्था वःगु खः । तर राजनीतिक कासा नं खः, प्रदेश नं ३ या मुख्यमन्त्री डोरमणी पौडेल जुइगु निश्चित जुइधुंकूगु दु ।
पहिचानया ल्याखं थुगु प्रदेशया मुख्यमन्त्री नेवाः हे जुइमाः धइगु खँ पिहांवःगु जक मखु, थुकिया नितिं थीथी संघसंस्थां नं सः ल्ह्वनेगु ज्या जूगु खः । तर पहिचानया ल्याखय् न्ह्याबलें छगू पलाः ल्यूने लानाच्वंगु पार्टी एमालें हाकनं छक्वः ‘पहिचान विरोधी पार्टी’कथं थःत न्ह्यःने हःगु दु । पराजित जुयादीम्ह शाक्यं पार्टीया नायःपाखें हे ‘असहयोग’ याःगु धइगु अभिब्यक्तिं थुकियात अझ तिबः ब्यूगु दु ।
प्रदेश चुनावया इलय् प्रदेश नं. ३ या नामाकरण नेपालमण्डल, नेवाः ताम्सालिङ्ग तय्माः धकाः फुक्क धइथे पार्टी थःगु घोषित÷अघोषितकथं एजेण्डा दय्कूगु खः । यदि थुकथं नामाकरण मजुल धाःसा पहिचान हे मदइगु तकं उम्मेदवारतय्सं धाःगु खः ।
तर आः ३ नं. प्रदेशया नां थ्व निगुलिं मजुइगु नं निश्चित जुइधुंकूगु दु । छाय्धाःसा थुगु प्रदेशया नां ‘बागमती’ वा ‘गौरीशंकर’ तय्गु खँ उगु पार्टीया हे नेतात्सं खँ पितहःगु जक मखु, थुकियात ‘लबिङ्ग’ याय्गु ज्या तकं न्ह्याकेधुंकूगु दु । छुं नं जातीय नामं नामाकरण याय्फइमखु धकाः स्पष्टकथं न्ववाय्धुंकूगु दुसा राष्ट्रिय प्रजातन्त्र पार्टीं ला धार्मिक नां वइगु कथं नामाकरण याय्त इनाप याय्धुंकूगु दु ।
थुकिंयानाः आःया अवस्था स्वय्गु खःसा नेवाःतय्गु पहिचान हे मदइगु खःला धइगु नं न्ह्यसः ब्वलंगु दु । अथे हे नेवाः नां मदइकथंया नामाकरण मजुल धाःसा स्वनिगःया आदिवासी नेवाःतय्गु पहिचानया नितिं ज्या याय्गु धयाच्वंपिं प्रदेशसभाया नेवाः सांसद व नामाकरण मजुल धाःसा पहिचान हे धरापय् लाइ धकाः बय्बय् यानाच्वंगु नेवाः संघसंस्थातय् आः गजाःगु भूमिका म्हितीगु खः, अले थःगु पहिचानया नितिं नेवाःत गुकथं न्ह्यज्याइगु खः, व ला स्वय् हे ल्यं दनि ।
