२०८० चैत्र १६, शुक्रबार

नेवाः इकोनोमिक्सयात कयाः सहलह क्वचाल

लहनान्यूज | दिल्लागा चतुर्दशी ११३७ (जुलाई २२ २०१७)

नेवाः आर्थिक क्रान्तिया मुद्दा ज्वनाः न्ह्यःने वःगु ह्याउँनिभाः पुचलं नेवाः इकोनोमिक्स विषयस छगू सहलह ज्याझ्वः याःगु दु ।
 
यलय् जूगु सहलह मुँज्याय् नेवाः अभियन्ता अनुप सिं सुवालं ‘नेवाः इकोनोमिक्स, नेवाः स्वायत्त राज्यय् नेवाः आर्थिक विकासया लँपु’ विषयस ज्यापौ न्ह्यब्वयादीगु खः ।
नेवाः इकोनोमिक्सया थीथी पक्षयात कयाः पुचः दयेकाः नं सहलह जूगु खः ।
 
ज्याझ्वलय् नेवाः इकोनोमिक्स ताःलाकेत योजना, नेवाः समाजय् नेवाः इकोनोमिक्स गुकथं छ्यलेगु व नेवाः इकोनोमिक्सया अवधारणा लागू यायेधुंकाः नेवाः समाजं पृष्ठपोषण गुकथं यायेगु, नेवाः इकोनोमिक्स छ्यलेत कार्ययोजना, यायेमाःगु, फइगु अल्पकालीन व दीर्घकालीन ज्याझ्वः विषयस पुचः सहलह जूगु खः ।
 
 
प्यंगू अलग अलग पुचलय् सोहनलाल प्रधान, धीरेन्द्र राजभण्डारी, धनबहादुर महर्जन व राकेश मास्के सहजकर्ता कथं च्वनादीगु खः ।
 
पुचः सहलहस ज्ञानबहादुर महर्जन, उज्वल बज्राचार्य, मोहनमान श्रेष्ठ, सानुमैयाँ बज्राचार्य अले अच्यूतरत्न बज्राचार्य, प्रकाश श्रेष्ठ, उमेश बस्नेत, देवनारायण महर्जनं ब्वति कयादीगु दु ।
 
मेगु निगू पुचलय् मनरत्न शाक्य, मनराजा रंजित, ज्ञानीशोभा महर्जन व यावदप्रसाद रंजीत अले दयाचन्द्र श्रेष्ठ, रविनमान महर्जन व प्रदिप रंजितं ब्वति कयादीगु खः ।
 
थुगु सहलहया मू सारयात कयाः याकनं हे छगू अन्तक्र्रिया ज्याझ्वः यायेगु ह्याउँनिभाः पुचलं न्ह्यथंगु दु । अन्तक्र्रियास नेवाः इकोनोमिक्सया अवधारणा व मूज्या न्ह्यब्वयाः उकी अन्तक्र्रिया यायेगु पुचलं न्ह्यथंगु दु ।
Categorized in राष्ट्रिय