नेवाः कलाकार फुटसलया तयारी तच्वयाच्वन
लहनान्यूज | बछलागा पंचमी ११३७ (मे १६ २०१७)
सुखावति मल्टि प्रोडक्सनया ग्वसालय् जुइत्यंगु नेवाः कलाकार मैत्रीपूर्ण फुटसल कासाय् कलिउडया नांजाःम्ह हिरो धीरेन शाक्य व नांजाःम्ह द्वन्द निर्देशक राजेन्द्र खड्गी नं म्हितः वइगु जूगु दु ।
कासाया नितिं आःतक्क च्यागू टिमया च्याम्ह क्याप्टेन क्वःजी धुंकूगु दु । मुक्कं च्यागू टिमयात टिम ए व टिम बी कथं निगू पुचलय् ब्वथलाः हरेक टिमया क्याप्टेन क्वःछ्यूगु खः ।
टिम ए दुनेया टिमतयगु क्याप्टेनय् नांजाःम्ह द्वन्द निर्देशक राजेन्द्र खड्गीलिसें मेमेगु टिमय् हिरोइन आशिष्मा नकःमि, फोटोग्राफर राजभाइ सुवाल व म्येहालामि जुनु श्रेष्ठ ल्यःगु दु ।
अथे हे टिम बी दुनेया प्यंगू पुचः मध्ये छगुलिइ धीरेन शाक्य व मेमेगु पुचलय् कलाकार भिन्तुना जोशी, विनोद श्रेष्ठ, हिसिला महर्जनयात क्याप्टेन ल्यःगु दु ।
प्रत्येक टिमय् अतिरिक्त कासामिलिसें १०म्ह कासामि दइ । व कथं नेवाः कलाकारतयगु थुगु मैत्रीपूर्ण फुटबल कासाय् ८०म्ह कासामिपिनिगु ब्वति दइगु जूगु दु।
कासाया नितिं दुतिना ल्हापं कथं छम्ह कासामियाके ७०० तका कायेत्यनागु ग्वसाः खलकं न्ह्यथंगु दु । कासा धुंकाः जुइगु डिनरया नितिं जक थुगु धेबा कायेत्यनागु फुटसल कजि भोगेन्द्र मानन्धरं जानकारी बियादिल ।
उकिया लिसें कासाया झ्वलय् जुस व लन्च धाःसा ग्वसाः खलःपाखें हे बीगु नं धाःगु दु । कासा थ्व हे वइगु ज्येष्ठ २० गते येँया पक्नाज्वःया कुमारी फुटसलय् जुइत्यंगु दु ।
Categorized in मनोरन्जन
