नेवाः न्ह्यलुवाःपिनिगु नेवाः ताम्सालिङ तयेत माग
लहनान्युज | सिल्लाथ्व तृतिया ११४० (जनवरी २७ २०२०)
नेवाः न्ह्यलुवाःपिं जनकवि दुर्गालाल श्रेष्ठ, मल्ल के. सुन्दर, डा. महेशमान श्रेष्ठ, राजेन्द्र श्रेष्ठ, तीर्थराम डंगोल, दिलीप महर्जनपिन्सं छगू मंकाः वक्तव्य पितब्युसें संघीयताया मूल धर्म व मान्यताया अःखः प्रदेश ३ या नामांकन बागमती प्रदेश तयेत सत्तारुढ दल नेपाल कम्युनिष्ट पार्टीया सचिवालयपाखें असंवैधानिक, असंसदीय व अलोकतान्त्रिक निर्देशनयात हूबहु पालना याकेत सार्वभौम प्रदेशसभाया संसदपिन्त विवश यायेगु गुगुकथं अमर्या्दित चलखेल जुयाः २०७६ पौस २७ गते बागमती प्रदेश नामांकन घोषणा जुल, उकियात थःपिनिगु पूर्ण असहमति व विरोध दूगु खँ न्ह्यथंसें मंकाः वक्तव्य पितब्यूगु दु ।
उगु मंकाः वक्तव्यय् १० दँया जनयुद्ध, ऐतिहासिक जनआन्दोलन, मधेस आन्दोलन व जनजाति आन्दोलनया थौंतकया मर्म व भावना लिसें उपलब्धीयात समाप्त यायेगु षडयन्त्र जूगु महसूस यानागु खँ नं न्ह्यथनातःगु दु ।
नेवाः न्ह्यलुवाःपिन्सं पिथंगु वक्तव्यया पूर्णपाठ ब्वनादिसँ ः
वक्तब्य
संघीयताया मूल मर्म व मान्यता अःखः ३ नं. प्रदेशया नां बागमती प्रदेश तयेत सतारुढ दल नेपाल कम्युनिष्ट पार्टी (नेकपा)या सचिवालयया असैबधानीक, असंसदीय व अलोकतान्त्रिक निर्देशनयात हुबहु पालना याकेत सार्वभौम प्रदेशसभाया सांसदपिन्त विवश याकेत गुगु कथं अमर्या्दित चलखेल जुयाः २०७६ पौष २७ गते बागमती प्रदेश नामाकंन घोषणा जुल, थुकिइ जिमिगु पूर्ण असहमति व विरोध दुगु खँ थ्व मंका बक्तब्य मार्पmत न्ह्यथनाच्वना ।
लिसें जनताया पक्षय् खबरदारी यानाच्वंनेमाःगु प्रतिपक्षि दलतय्गु रवैया व पिछलग्गुपनप्रति खेद ब्यक्त यानाच्वना । नापं ३ नं. प्रदेशया नां तत्काल संशोधन यानाः नेवाः तामसालिंग प्रदेश तयेत माग यानाच्वना ।
जनताया बलिदानीपूर्ण संघर्षं पलिस्था जूगु संघीयता उत्पीडित जाति, भाषा, क्षेत्र व लिंगया राज्यसत्ताय् पहिचान, पहुच व प्रतिनिधित्वया नितिं खः, तर राज्यं जनतायात मखंसे खुसि, पहाड, हिमाल, भुगोल जक खनीगु पञ्चायतीकालीन मानसिकताया निरन्तरता कथं वःगु बागमती प्रदेश नामाकनं राज्य सञ्चालनय् संघीयताया मूल सिद्धान्त पूर्णत बहिष्कृत जूगु जिमिसं थुइकाच्वना । अले १० वर्षे जनयुद्ध, ऐतिहासिक जनआन्दोलन, मधेश आन्दोलन व जनजाति आन्दोलनया थौं तकया मर्म, भावना व उपलब्धियात समाप्त यायेगु षडयन्त्र जूगु महसुस यानाच्वना ।
नेपाल कम्युनिष्ट पार्टी (नेकपा)या नेतृत्वं गणितिय बहुमतया बलं संघीय लोकतान्त्रिक गणतन्त्रयात एकल जातिय शासनय् परिणत यायेत्यंगु बहुभाषी, बहुजातिय, बहुसाँस्कृतिक, बहुधार्मिक नेपाःमि जनतायात गुगु नं कथं स्वीकार्य जुइमखु । उकिं थ्व इलय् संघीयताया सिद्धान्तया रक्षा, नेवाः पहिचानया रक्षा, नेवाः भूमी, सँस्कृति सम्पदा व नेवाः जनजिबिकाया नितिं नेवाः समुदायलं निरन्तर संघर्ष याइगु घोषणा यानाच्वना ।
अले थुगु दिर्घकालीन संघर्षय् साथ, समर्थन व सहभागिताय् नापं जायेत सकल न्याय समानता, पहिचान व संघीयता पक्षधर आदिवासी जनजाति व उत्पीडित जनतायात अपिल यानाच्वना ।
