नेवाः यूट्युब च्यानल निदँ क्यन
नृपेन्द्रलाल श्रेष्ठ | पोहेलाथ्व पारु ११४० (दिसेम्वर २७ २०१९)
कला–संस्कृति, संगीत, साहित्यलिसें भाषायात थपू यायेगु आज्जुं दच्छि न्ह्यः एड जोन प्रा.लि.पाखें नीस्वंगु नेवाः यूट्युब च्यानल दच्छि क्यंगु लसताय् छगु ज्याझ्वः नेपाः बैक्वटय् जुगु दु । उगु ज्याझ्वलय् मूपाँहा कथं बरिष्ठ फोटोग्राफर राजभाई सुवाल बिशिष्ट पाँहा कथं मिस नेपाल अनुष्का श्रेष्ठ झायादिगु खः ।
उगु ज्याझ्वलय् मूपाहाँ बरिष्ठ फोटोग्राफर सुवालं नेवाः यूट्युब च्यानलयात दच्छि क्यंगु लसताय् सुभाय् देछानादिसे प्रगतिया कामना यानादिगु खःसा नेवाः तयेगु छगु फुक्क ख्यः दुथ्याःगु एप्स थौंया आवश्यकता दुगु धकाः बिचाः प्वकादिगु खः ।
मूपाहाँ सुवालं थःगु कुतलं मिस नेपाल जूम्ह कलाकार झरना बज्राचार्यया अबु मुस्मां जूसां मां बज्राचार्य जुगुलि थःलिसे नेपालभासं हे खँ ल्हाइगु खँ धका धयादिसे अथेहे २०१० या मिस नेपाल सदिक्षा श्रेष्ठ नेवाः जूसां नं नेपालभाषं खँ ल्हाये मसः । तर थःम्हं नेपालभाषं खँ ल्हाकातुं त्वतागु खँ नं कनादिगु खः ।
नेवाः अनलाईनन्यूजया प्रमुख सुजीव बज्राचार्यया सभाधक्ष्यताय् जुगु उगु ज्याझ्वलय् नेवाः अनलाईनन्यूजया संरक्षक बरिष्ठ सिनेपत्रकार विजयरत्न असंबरें सुभाय् न्वचू बियादीगु उगु ज्याझ्वलय् चिहा संकिपा ‘ध्वः छध्वः रेखां क्यूगु’या बाखं च्वमि शशीकला मानन्धरं ‘ध्वः छध्वः रेखां क्यूगु’ बाखंया विषयस ध्वाथुइकादिगु खः ।
नेवाः यूट्युबया ब्यानरं निर्माण याःगु ‘ध्वः छध्वः रेखां क्यूगु’ चिहासंकिपा कासाय् न्हाप लाःगुलिं लसता ज्याझ्वः यासें उगु संकिपाया कलाकार, प्राविधिकपिन्त सम्मान यासें नगद लःल्हाःगु खः ।
