नेवाः संकिपाः “स्वय्नगु” विशेष शो
लहनान्युज | तछलाथ्व चौथी ११३८ ( जुन १७ २०१८)
वंगु असार २ गते यल भोलध्वाखाय् च्वंगु ज्यापु प्रज्ञाभवनय् नेपालभाषाया संकिपाः“स्वय्नगु” विशेष शो हाउसफुल जुइक क्यनेज्या क्वचाल ।
हलिं नेवाः गुथि किपुल्चा कचाया नितिं सिने ग्राफिक्स बलम्बुया न्ह्यब्वया ऐतिहासिक लकस दुथ्यानाच्वंगु नेवाः संकिपाः “स्वय्नगु” पुलांगु नेवाः बियोगान्त मतिना बाखं खः ।
थुगु बाखंयात प्याखँया रुपय च्वया निर्देशन यानादीम्ह खः अमृतमान महर्जन । निर्माताया रुपय गोपाल नकःमि व अजः महर्जन निर्माता रुपय् दूगु थुगु संकिपाःया मूप्याखँ म्वःया रुपय भिन्तुना जोशी, सुरज ब्यञ्जनकार, रनेन्द्र महर्जन, शुशिला तन्डुकार, अमृतमान महर्जन, सानु ताम्रकार, नारायणदेवी महर्जन, नगिना जोशी लगायत म्हिता च्वनादीगु खः ।
नेवाः संकिपाःयात प्रचार प्रसार व प्रवद्र्धन यायेगु मूतातुनां नापं निर्माण जूगु नेवाः संकिपाः “स्वय्नगु” यलया स्वकुमिपिनिगु माग बमोजिम विशेष शो क्यने ज्या जूगु खँ विशेष शोया कजि कलाकार सुरज ब्यञ्जनकारं लहनान्युजयात कनादील ।
नापं नेवाः प्याखँ स्वयेत मनुतयसं हाउसफुल जुइक क्यंगु उपस्थिति व उत्साह प्रति आभारी प्वंकुसें थुकथं नेवाः तयेगु हःपाः दयाच्वन धासा नेवाः संकिपाः विकास न्हियांन्हिथ अप्वइगु खँ ब्यञ्जनकारं कनादील ।
उखुन्हु हे थुगु नेवाः संकिपाःया विशेष शो “स्वय्नगु” झापाय् न छगू क्यने ज्या जूगु खँ निर्देशक अमृतमान महर्जनंं लहनान्युजयात कनादीगु खः ।
