२०८१ आषाढ ५, बुधबार

नेवाः संगीत व संकिपाय् होलि म्ये

विजयरत्न असंबरे | चिल्लाथ्व चतुर्दशी ११४३, फागुन २२ सोमवाः

दँय्दसं फागु न्ह्यःने थ्यनकि नेवाःतय् छपु म्ये अथें हे म्हुतुइ घानाच्वनी । न्ह्याबलें हे धइथें गुनगुन यानाच्वंगु दइ “अबिरया होलि, तंचाया ला ल्यासे ।” थ्व झीगु तजिलजिं जाःगु होलि म्ये खः । न्हापांगु नेवाः फिल्म “सिलु” या थ्व म्ये आःतक नं दँय्दँसं होलिया इलय् थ्वय्गु याः । नेपालभाषाया जक मखु, नेपाःया हे फिल्म ख्यलय् दकले न्हापांगु खुसी होली म्ये छ्यःगु नं थ्व हे खः । 
“अबिरया होलि” धइगु नेवाः लोक लय् बसन्तया लसय् हनातःगु म्ये खः । होलिया बखान यानातःगु थ्व म्ये दुने ल्यासेल्याय्म्ह नुगःया भावयात हिसि दय्क न्ह्यब्वयातःगु दु अले ल्यासेल्याय्म्ह दथुइ जुइगु ख्याःखँयात नं धिसिलाक्क न्ह्यब्वयातःगु दु । बसन्तया लोकलसय् हालातःगु थ्व म्येया सगीतकार गणेशप्रसाद श्रेष्ठ खःसा हालातःपिं जुजुकाजी रन्जित व रचना जि.सि. खः । थ्व म्ये “सिलु” या छगू टर्निङ्क प्वाईंटया रुपय् न्ह्यब्वयातःगु म्ये खः । जय श्रेष्ठ, नबिना श्रेष्ठ, मदनकृष्ण श्रेष्ठ व हरिवंश आचार्य लगायतया मू कलाकारतय् अभिनय दूगु थ्व म्ये छगू ज्वःमदुगु होलि म्ये खः ।
 
लिपा लिपा पिहांवःगु आपालं होलि म्येय् थुकिया प्रभाव खनेदु । विशेष यानाः थौंकन्हय्या ई धइगु म्युजिक भिडियोया युग खः । होलिया चर्चा खस वा नेवाः भाय्या म्युजिक भिडियो दुने आपालं दुथ्याका हयाच्वंगु दु । रङ्गया उत्सव कथं हनावयाच्वंगु होलि न्ह्यःने वःलिसे थुकिया लिच्वः मनोरञ्जन व सङ्गीत ख्यलय् नं लानावुइगु धइगु न्हूगु खँ मखु । दसुया रुपय् चर्चा याय्बलय् आपालं होलि म्ये पिहां वयाच्वंगु खनेदुसा अज्याःगु म्येय् रवि भोमिया “होलि म्हितावःम्ह मैंचा” छपु नं खः । राजाराम नापितं च्वयातःगु थ्व म्येया हालामि व लय्चिनामि नं रवि भोमि हे खःसा थुकी ख्वप देय्या नेवाः भाषिका छ्यलातःगु दु ।
 
बालमुकुन्द प्रजापतिया निर्देशनय् पिहांवःगु थ्व म्येया प्याखंम्वःत सरिता बज्राचार्य, सुजना बज्राचार्य, अन्नु महर्जन, अनु खड्का, सिताराम मनका राजा, रमेश बल्ल, लक्ष्मीप्रसाद ओम बाबा, महेश प्रकाश हाडा खः । मेगु होलि म्येय् सानु तामाङ्ग व उपेन्द्र शाही निशधया “होलिया मेला” खः । पुलांगु होलिम्येया आधुनिक भर्सनया रुपय् पिदंगु थ्व म्येय् करुण महर्जन व रुमी महर्जन प्याखंम्वः कथं दुसा दिनेश महर्जनया निर्देशनय् तयार जूगु खः ।
 
 
 
नेवाः संकिपा व संगीत ख्यलय् आपालं होलि म्ये पिहां वयाच्वंगु दु । उकी मध्ये छपु नेवाः सुपरस्टार अवार्डया दाबेदारया रुपय् बय्बय् जूपिं निम्ह स्टारय् छम्ह धइम्ह संकिपा ख्यःया लोकंह्वाःम्ह हिरोइन भिन्तुना जोशी नं खने दयाच्वंगु दु । “होलि हसना” बोलया थ्व म्येय् भिंतुनालिसें मेम्ह सुपरस्टार अवार्डया दाबेदार कथं कयातःम्ह रुपेन श्रेष्ठ ‘थक्वाः’या मेन रोल दु । थ्व म्येया मूहालामि हसना शाक्य खःसा थुकी राजु शाक्यया नं सः न्यनेदु। अथे हे थ्व म्ये नेपाःया नांजाःम्ह संगीतकार सचिन सिहं लसय् हनादीगु खः। थ्व म्ये “सौभाग्य” नांयागु म्येचालय् पिदंगु खः । थुगु म्येयात वंशीधर बज्राचार्यं च्वयादीगु खःसा म्युजिक भिडियोया निर्देशक भुवन श्रेष्ठ व हुलाप्याखं स्यनामि रवि राना मगर खः ।
 
मेगु छपु बय्बय् जूगु होलि म्ये धइगु नेवाः म्यूजिक भिडियो ख्यलय् आपालं कलाकार दुथ्याकाः अथे धयागु मल्टिस्टारर म्ये दय्केगुलि न्ह्यचिलादीम्ह सुनिता राजभण्डारी जुनुया परिकल्पना व निर्देशनय् दयेकूगु ‘अबिरं इलाः लखं छ्वाकाः...’ बोलया म्ये खः । थ्व होलि म्येय् नं नेपालभाषाया आपालं लोकंह्वाःपिं कलाकारतय्त दुथ्याकाः मल्टिस्टार होलि म्ये तयार याःगु दु । थुगु म्यूजिक भिडियो दुने ८०म्ह् ति कलाकारतय्सं अभिनय याःगु दु ।
 
थ्व म्यूजिक भिडियो दुने ‘राजमति’ संकिपाया नायः मणिराज लवत, नकिं हिसिला महर्जनया नापनापं शोभा महर्जन (बसन्त ऋतुया नकिं), निकी महर्जन, रोजीना सुवाल, रश्मी महर्जन, आशाकाजी थकू, पूर्णिमा शाक्य, शोभा महर्जन (टिभि ज्याझ्वः न्ह्याकामि)ं, नगीना जोशी, अकलमान श्रेष्ठ, मञ्जु श्रेष्ठ, सुनीता श्रेष्ठ ठाकुर, हरिमान दिवाकर, राजु महर्जन लिसें आपालं कलाकारतय्सं अभिनय याःगु दु । ‘अबिरं इलाः लखं छ्वाकाः...’ बोलया थ्व होलि म्येय् स्वयं निर्देशक परिकल्पनाकार सुनिता जुनु राजभण्डारीं नं म्हितातःगु दु । 
 
थुकिया कोरियोग्राफर सुजन बज्राचार्य खः । अथेहे आपालं कलाकारत मुनातःगु मेगु होलि म्ये धइगु रवि भोमिं दय्कुगु होलि म्ये खः । रवि भोमि व साबित्री धौबन्जालं हालातःगु थ्व होलि म्ये वास्तवय् धाय्गु खःसा “सिलु” या होलि म्येया आधुनिक रुप धाःसां छुं पाइमखु । रवि भोमिया हे च्वसां पिदंगु थ्व म्येया लय्चिनामि नं रवि भोमि हे खः । थुकी “तिनतिकः महाबिकः” फिल्मया स्वम्ह हिरोइन् निकि महर्जन, रेश्मी महर्जन, रेना महर्जनया नापनापं ख्वपया नांंजाःपिं कलाकार हरिकृष्ण दुवाल, राजु मानन्धर लगायतया आपालं कलाकारतय्सं न्ह्यइपुसेच्वंक होलि म्हिताच्वंगु दु । थ्व म्येया म्युजिक भिडियो निर्देशन याःम्ह अनुज डंगोल खः । 
 
अथेहे मेगु बय्बय् जूगु होलि म्ये धइगु नेपाःया नांजाःम्ह कलाकःमि सुरेन्द्र तुलाधरं निर्देशन याःगु “होलि रे होलि” म्ये खः । सुरेन्द्र तुलाधरया हे च्वसां पिदंगु थ्व म्येया लय्चिनामि नील शाक्य खःसा थुकी भिन्तुना जोशी, अमिता जोशी, रुमन जोशी, सनम शाक्य, भोगेन्द्र मानन्धर, राज्यलक्ष्मी स्थापित, भिमसेन रिसालया नापनापं सुरेन्द्र तुलाधर वं आपाल मेमेपिं कलाकारपिनिगु नं अभिनय दुथ्यानाच्वंगु दु । 
 
होलियात कःघानातःगु आपालं नेवाः म्ये दुसा अज्यागु गुलिखे म्येया म्युजिक भिडियो नं पिदनाच्वंगु दु । थथे पिदनाच्वंगु दक्वं नेवाः होलि म्येयात कयाः चर्चा याय्गु सम्भव नं मदु । होलि धइगु हे लसता व उमङ्गया पर्व खः । थजाःगु पर्वयात कःघानाः आपालं आपाः म्युजिक भिडियो पिहांवःगु धइगु नं लसताया हे खँ खः । नेपालभाषाया संगीत व संकिपा ख्यलय् अतिकं नांजाःपिं कलाकारत हे होलि म्येया म्युजिक भिडियो दुने नं खनेदयाच्वंगु दु ।
 
उकी मध्ये छम्ह पवन जोशी नं खः । पवन जोशीया निर्देशनय् पिहांवःगु “फागुया बेला रंगया मेला” धाःगु म्येय् लोकं ह्वाःह सुरज व्यन्जकारया नापं शर्मिला महर्जन, सन्जु श्रेष्ठ, मोहन शोभा, रानी शोभा, दिकेश महर्जन थेंज्याःपिं आपालं कलाकार दुथ्यानाच्वंगु दु । थ्व म्ये च्वःम्ह रामभक्त महर्जन, लय् चिनादीम्ह ज्ञानेश्वर महर्जन खःसा सः ब्यूपिं मथुरा महर्जन, मोहनशोभा महर्जन, सुरेन्द्र श्रेष्ठ व स्वस्ती महर्जन खः । थुकी किपूया थीथी धार्मिक व ऐतिहासिक महत्वं जाःगु थाय्बाय्या लू दुथ्यानाच्वंगु दु । 
 
अथेहे मेगु छपु चर्चित होलि म्ये धइगु भेष महर्जनं हालातःगु “होलिया मेला” खः । राजेशमान सिंहं निर्देशन याःगु थ्व म्येया म्युजिक भिडियो दुने आराध्यालक्ष्मी खडगी व किरण श्रेष्ठ लगायत आपालं कलाकारतय्सं होलि म्हिताः न्ह्यइपुकाच्वंगु दु । होलिया रङ्ग व उमङ्गयात कःघानाः म्युजिकाम्युजिक धाःगु पुचलं न्ह्यब्वयातःगु “बसन्त — द सिजन अफ जोय” छपु ज्वःमदूगु न्ह्यब्वया खः धाय्माः । म्युजिक म्युजिका पुचःया बसन्त म्येया म्युजिक भिडियो नं छपु च्वछाय्बहःगु बसन्त म्ये खःसा थुकी नं होलिया वर्णन यानातःगु दु । थुकी आपालं कलाकारत स्वय्दु । थन थुलि जक मखसें आपालं होलि म्ये पिदनाच्वंगु दु । थुकथं नेवाः संकिपा व संगीत ख्यलय् होलि म्येया बिस्कं थाय् कयाहःगु दुसा विशेष यानाः म्युजिक भिडियो ख्यलय् ला होलिया रंगं जाःगु म्ये आपालं स्वय्दयाच्वंगु दु ।