नेवाः सूचना केन्द्रया उलेज्या
रबि महर्जन | दिल्लागा पंभमी (जुलाई १४ २०१७)
येँय् जूगु छगू ज्याझ्वःया दथुइ नेवाः सूचना केन्द्रया उलेज्या जूगु दु ।
सूचना केन्द्रया दुजः रमिता बज्राचार्यं न्ह्याकादीगु उगु ज्याझ्वलय् मय्जु सरस्वती तुलाधरं लसकुस न्वचु तयादीगु खःसा पवित्र कसाः नं सूचना केन्द्रया उद्देश्ययात कयाः नुगःखँ तयादीगु खः । उगु ज्याझ्वलय् दुजःपिं रवि महर्जन, नरेन्द्र श्रेष्ठ, रत्नकाजी महर्जन ‘लूनिभाः’, विराजकाजी राजोपाध्याय, श्रीकृष्ण सुलु, रत्नकाजी महर्जन ‘मन’, सौरभ कायस्थं थःथःगु म्हसीका बियादीगु खः ।
सूचना केन्द्रया नायः राजेन्द्र रञ्जितया सभाध्यक्षताय् जूगु उगु ज्याझ्वलय् पाहांकथं नेवाः देय् दबूया नायः नरेश ताम्रकार, नेपालभाषा केन्द्रीय विभागया प्रमुख प्रा. डा. चन्द्रमान बज्राचार्य, प्रा. प्रेमशान्ति तुलाधर, सह–प्रा. तुलसीलाल सिंह, प्रा.डा. तुयु बहादुर महर्जन, गोर्की श्रेष्ठपिं झायादीगु खःसा वय्कःपिन्सं नेवाः सूचना केन्द्रं थःगु उद्देश्यकथं न्ह्याः वनेफय्मा धकाः भिन्तुना नं बियादीगु खः ।
