न्याम्ह पत्रकारतय्त न्यागु सिरपाः
नृपेन्द्रलाल श्रेष्ठ | ञंलाथ्व एकादशी ११३७ (सेप्तेबर १ २०१७)
नेवाः पत्रकार राष्ट्रिय दबूया न्याक्वःगु दँमुँज्याया झ्वलय् नेपाःया पत्रकारिता ख्यलय् ताःई न्ह्यःनिसें क्रियाशील जुयाः ज्वःमदुगु योगदान बियादीपिं न्याम्ह पत्रकारतय्त थीथी सिरपाः लःल्हाःगु दु ।
ज्याझ्वलय् मूपाहां येँ महानगरपालिकाया प्रमुख विद्यासुन्दर शाक्यं हनापौ व विशेष पाहां शताब्दी पुरुष संस्कृतिविद् डा. सत्यामोहन जोशीं दोसल्लां न्यय्कादीगु खःसा सिरपाःया दातापिन्सं झिद्वः÷झिद्वः तका लःल्हानादीगु खः । हनेगु झ्वलय् समाजसेवी सुरबहादुर श्रेष्ठं वरिष्ठ संस्कृतिविद् डा. सत्यमोहन जोशीया नामय् पलिस्था यानादीगु “वाङमय शताब्दी पुरुष सत्यमोहन जोशी पत्रकारिता पुरस्कार” वरिष्ठ पत्रकार नापं शुक्रवाः तँसापौया सम्पादक रमेशकाजी स्थापितयात लःल्हाःगु खः ।
अथेहे नेपाःया न्हापांम्ह त्रिपिटकाचार्य नापं वि.सं. २००१य् तत्कालीन प्रधानमन्त्री जुद्ध शम्शेरं पित्युंपिं च्याम्ह भिक्षु मध्ये छम्ह कुमारकाश्यप महास्थविरया नामय् भिक्षु कौण्डन्यं पलिस्था यानाबिज्याःगु “भिक्षु कुमारकाश्यप स्मृति पत्रकारिता पुरस्कार” राजेन मानन्धरयात, समाजसेवी मोतिशान्ति शाक्यं थः मांया नामय् पलिस्था यानादीगु “ज्ञानदेवी स्थापित स्मृति पत्रकारिता पुरस्कार” स्वनिगः पिने पिहां वयाच्वंगु छगू जक वाःपौ “हेटौंडा” साप्ताहिकया कार्यकारी सम्पादक मोहनमान सांगामियात, समाजसेवी नापं व्यवसायी बाबुराजा ज्यापुं नीस्वनादीगु “फोटो पत्रकारिता पुरस्कार” वरिष्ठ फोटो पत्रकार राजेन्द्र चित्रकार व सञ्चारकःमि शोभा श्रेष्ठं थः मां व अबुया नामय् नीस्वननादीगु “पुरुषोत्तम–निरादेवी पत्रकारिता पुरस्कार” वरिष्ठ कार्टुनिष्ट श्याम डंगोल ‘खोकना’यात लःल्हाःगु खः ।
थ्वहे झ्वलय् नेपाल पत्रकार महासंघया नवनिर्वाचित पदाधिकारीपिन्त विशेष पाहां संस्कृतिविद् डा. सत्यमोहन जोशीं न्हूगु कार्यकाल सुथांलाक्क न्ह्याकेफय्मा धकाः भिन्तुना देछासें हनादीगु खः ।
नेवाः राष्ट्रिय पत्रकार दबूया केन्द्रीय नायः श्रीकृष्ण महर्जनया सभाध्यक्षताय् जूगु उगु ज्याझ्वलय् विशेषपाहां डा. जोशीपाखें पत्रकार दबूया “लुमन्ति पौ” नं विमोचन यानादीगु खः ।
ज्याझ्वलय् मूपाहां येँ महानगरपालिकाया प्रमुख विद्यासुन्दर शाक्यं पत्रकारिता कोषया नितिं न्यागू लखतका ग्वाहालि बीगु बचं बियादीगु खः । अथेहे विशेष पाहांलिसें संस्कृतिविद् डा. सत्यमोहन जोशी, सूचना विभागया महानिर्देशक वीरबहादुर राई, नेपाल प्रेस काउन्सिलया दुजः शुभेच्छा विन्दु, मधेसी पत्रकार समाजया नायः मोहन सिंह, आदिवासी जनजाति पत्रकार महासंघया सचिव गजुरधन राई, नेपाल पत्रकार महासंघया सचिव रामप्रसाद दाहालपिन्सं प्रेस स्वतन्त्रताया अभ्यासया नितिं सञ्चारमाध्यम समावेशी जुयाः थीथी जातजाति व भाषाभाषीया सःयात थाय् बीमाःगु व मांभाषाया पत्रकारिताया विकासया नितिं राज्यं ध्यान बीमाःगु खँ न्ह्यथनादिसें पत्रकार दबूयात भिन्तुना देछानादीगु खः ।
अथेहे सम्मानित जुयादीपिं रमेशकाजी स्थापित, श्याम डंगोल ‘खोकना’, सल्लाहकार नापं नेपालभाषा टाइम्सया सम्पादक सुरेशकिरण मानन्धर, दातापिं सुरबहादुर श्रेष्ठ, भिक्षु कौण्डन्य, प्रा. प्रेमशान्ति तुलाधर, मोतिशान्ति तुलाधर, शोभा श्रेष्ठपिन्सं थःथःगु नुगःखँ तयादीगु खः ।
दबूया छ्याञ्जे केके मानन्धरं न्ह्याकादीगु उगु ज्याझ्वलय् उपस्थित जुयादीपिंलिसें सकलसित सुनिल महर्जन लसकुस यानादीगु खः ।
