न्हापांखुसी एकदिवसीय कासाय् ऐतिहासिक जीत
– प्रजीत शाक्य
नेपाःया क्रिकेट इतिहासय् थ्व वाः निगूकथं कोशेढुङ्गा साबित जुल । नेपालं न्हापांखुसी अन्तर्राष्ट्रिय एकदिवसीय (ओडिआई) कासा म्हितल । नेपाल नेदरल्याण्ड्स् विरुद्ध निगू कासाया एकदिवसीय श्रृङ्खलाय् ब्वति काःगु खः । गुकी मध्ये निगूगु कासा त्याकाः नेपालं न्हापांखुसी एकदिवसीय कासा त्याकाः मेगु इतिहास दय्केत ताःलात ।
आइसीसीपाखें अन्तर्राष्ट्रिय एकदिवसीय कासाया नितिं मान्यता काःगु थ्यंमथ्यं स्वला लिपा नेपालं अन्तर्राष्ट्रिय एकदिवसीय कासा म्हितूगु खः । वंगु मार्चय् जिम्बोबेय् जूगु एकदिवसीय विश्वकप छनोटपाखें नेपालं एकदिवसीय मान्यता प्राप्त याःगु खः । अन्तर्राष्ट्रिय क्रिकेटय् पलाः तःगु २२दँ लिपा नेपाःया म्हगस पूवंगु खः । छाय्धाःसा विश्व क्रिकेटय् एकदिवसीय मान्यता काय्खंगु धइगु चाःचू खँ मखु, थनतक थ्यंगू टिमयात विश्वया हे उत्कृष्ट टिमकथं काइगु खः ।
विश्व क्रिकेटय् नेपालं यक्व हे उपलब्धि काय्धुंकूगु दु । न्हापा टेष्ट मम्हितूगु देय् दथुइ नेपाः शीर्ष थासय् लाःगु टिम जूगु खः । विश्वकप टि–ट्वान्टीइ न्हापांगु सहभागिताय् हे स्वंगू मध्ये निगू कासाय् दुर्लभ जीत हासिल याःगु खः । अन्तर्राष्ट्रिय टि–ट्वान्टीया मान्यता नेपाःया क्रिकेट टिमं प्राप्त याःगु कोशेढुङ्गाया छुं छुं दसू जक खः । थुकी मध्ये आः एकदिवसीय मान्यता थप जूगु दु । गुगु हरेक दृष्टिकोणं थौंतकया दकलय् तःधंगु उपलब्धि खः धाःसां छुं पाइमखु ।
खय्त ला नेदरल्याण्ड्स्य् वनेन्ह्यः नेपालं क्रिकेटय मक्का कइगु कयातःगु बेलायतया लर्ड्सय् त्रिकोणीय टि–ट्वान्टी श्रृङ्खला नं म्हितूगु खः । उगु श्रृङ्खलाय् विश्व क्रिकेटया दकलय् पुलां मेरिलिबोन क्रिकेट क्लब (एमसीसी) व नेदरल्याण्ड्स् नं दुगु खः । नेपालं घरेलु टिमयात बुकूगु खःसा नेदरल्याण्ड्स् विरुद्धया टि–ट्वान्ती कासा वा वयाः स्थगित जूगु खः । उकिं नेपाः व नेदरल्याण्ड्स् मंकाःकथं विजेता घोषित याःगु खः ।
थुगु कासाय् धाःसा नेदरल्याण्ड्स्लिसेया एकदिवसीय श्रृङ्खलाय् केन्द्रित जुल । अन्तर्राष्ट्रिय एकदिवसीय कासाया डेब्यू कासाय् नेपालं त्याःगु सवाः धाःसा काय् मखन । वरियताया धलखय् थः स्वयां च्वय् लाःगु व अनुभवी नेदरल्याण्ड्स्यात उमिगु हे कासाख्यलय् बुकेगु अःपू खँ मखुत । तर नेपाःया न्ह्यःने त्याकेगु ह्वःताः धाःसा मवःगु मखु । अझ नेपाः कासाया अप्वः धइथें ई विजयया हे स्थिती दुगु खः ।
न्हापां ब्याटिङ्ग याःगु नेदरल्याण्ड्स्यात ४७.४गू ओभरय् १८९गू रनय् हे सीमित याःगु खः । गुगु लक्ष्य पूवंकेगु उलि थाकूगु धाःसा मखु । उकिं नेपालं डेब्यू याःगु कासाय् त्याइगु थ्यंमथ्यं पक्का हे जुल धाःसा ज्यूगु अवस्था खः । तर ब्याटिङ्गं निराश यात । नेपाः ४१.५ ओभरय् १३४गू रनय् फुक्कं आउट जुल ।
अझ प्रारम्भिक ब्याट्सम्यानपिं ज्ञानेन्द्र मल्ल व अनिल शाहं न्हापांगु विकेटया नितिं ५८गू रनया साझेदारी याःगुलिं नं नेपाःया पराजय ल्वमंकेफइकथंया मजुल । ज्ञानेन्द ५१गू रन दय्कूगु खः । गुकिं यानाः वय्कः एकदिवसीय कासाय् अर्धशतक दय्कूम्ह नेपाःया न्हापांम्ह ब्याट्सम्यान जुयादिल ।
नेपाः छगू इलय् छगू विकेटया क्षतिइ ८५गू रनया स्थिती दुगु खः । थजाःगु अवस्थाय् कासा त्याके मपूmगु धइगु नेपाः हे दोषी खः । नेपालं लिपा गुंगू विकेटय् मुक्कं ४९गू रन जक दय्केफूगु खः ।
उगु कासा नेपाःया लिजेण्ड क्रिकेट कासामि शक्ति गौचनया लिपांगु कासा नं जुल । थुगु भ्रमणलिपा हे शक्ति गौचनं सन्यास काय्गु न्हापा हे घोषणा यानादी धुंकूगु खः । वय्कलं आः घरेलु कासाख्यलय् छगू बिदाइ कासा म्हिताः क्रिकेट जीवनपाखें “बाइबाई” धयादी । उगु कासाय् नेपाःया नितिं न्हापांगु अन्तर्राष्ट्रिय एकदिवसीय विकेट काःगु गौरब धाःसा सोमपाल कामीं प्राप्त याःगु दु ।
न्हापांगु कासा बुइधुंकाः नेपाःया ल्हातिं श्रृङ्खला त्याकेगु म्हगस मदय्धुंकल । तर नं निगूगु कासा त्याकाः श्रृङ्खला बराबरी याय्गु व न्हापांगु एकदिवसीय कासा त्याकीगु अपेक्षा धाःसा नेपाःया टिमपाखें दुगु हे खत । नेपालं निगूगु कासाय् निराश मयात । अथेखःसां उगु कासा धाःसा नाटकीय हे जुल । लिपांगु इलय् तक नं निगू टिममध्ये गुगु टिमं कासा त्याकी धइगु खँ धाय्पूmगु अवस्था मदुगु खः ।
नेपालं ४८.५गू ओभरय् फुक्कं आउट जूसें २१६गू रन दय्कल । नेपाल बलिङ्गय् नां जाः । उकिं थ्व स्कोर नेपाःया बलरतय्गु नितिं मनोबल थकाइगु कथंया जुयाब्यूगु दु । नेपालं उगु स्कोरयात बल्लतल्लं रक्षा यात ।
नेपाःया टिमय् थौंकन्हय् विकसित जूगु गुण धइगु गबलें नं मबुइगु मनोबल खः । डिभिजन टु व विश्वकप छनोटय् कमजोर सुरुवात याःसां नं लिपांगु इलय् तक ल्वाय्गु बानीं नेपालं अन्तर्राष्ट्रिय एकदिवसीय मान्यता प्राप्त याःगु खः धाःसां पाइमखु । थौंकन्हय् छुं छुं कासाय् नेपालं कासा नाटकीय ढंगं त्याकेगु बानी दय्कूगु दु । गुगु नेपाःया टिमय् दुगु उच्च मनोबलया
हुनिं सम्भव जूगु खः । उगु मनोबल नेदरल्याण्ड्स्यात नं निगूगु एकदिवसीय कासाय् बुकेत ज्या वल ।
उगु कासाय् सोमपाल अन्तर्राष्ट्रिय एकदिवसीय कासाय् नेपाःपाखें न्हापांम्ह “म्यान अफ दि म्याच” जुइगु ह्वःताः चूलाकल । नेपालं ऐतिहासिक विजय प्राप्त याय्गु झ्वलय् सोमपालं च्याम्हम्ह कासामिकथं ब्याटिङ्ग यानाः ४३गू बलय् दकलय् अप्वः ६१गू रन व लिपा वय्कलं कयादीगु न्हापांगु विकेट निर्णायक जूगु खः ।
नेपाःया रोहित पौडेलया नितिं नं निगूगु कासा विशेष जुल । थःगु ब्वज्यापाखें खास हे प्रभाव लाके मपूmसां वय्कः नेदरल्याण्ड्स् विरुद्धया कासाय् ब्वति कयाः एकदिवसीय अन्तर्राष्ट्रिय कासा म्हितूम्ह विश्वया हे प्यंगूगु ल्याखय् म्हो उमेरया कासामि जुयादीगु दु । वय्कलं १५दँ ३३५दिं दुबलय् एकदिवसीय क्रिकेट कासा म्हितूगु खः ।
इतिहास साक्षी दु, नेपाःया क्रिकेट टिम जक अजाःगु टिम खः, गुगु टिमं देशंपिने न्ह्याबलें उत्कृष्ट ब्वज्या याइ । तर यूरोपय् सिमीङ पीत जुइगु जूगुलिं नेपाःयात समस्या जुइगु ग्याचिकु नं उलि हे दुगु खः । छगू ला नेपाःया बलिङ्ग स्पीनय् निर्भर जुयाच्वंगु दुसा मेगु ब्याटिङ्ग नेपाःया कमजोरीकथं दं वयाच्वंगु खः । तर एकदिवसीय मान्यता प्राप्त टिमलिसे हरेक लकस, कासाख्यः व पिचय् म्हितेगु क्षमता दय्माः ।
उकिं नेपालं थुगुसी नेदरल्याण्ड्स्या भ्रमणय् अजाःगु छुं नं त्वहः मदय्कल व थःत एकदिवसीय मान्यताया नितिं हकदार जू धइगु नं क्यन ।
नेपालं अन्तर्राष्ट्रिय मान्यता प्राप्त याःगु स्वला लिपा एकदिवसीय कासा म्हितूगु खः । तर थ्व लिपा नेपाःया क्रिकेट पुचलं छु टिमलिसे म्हिती ? सुना नं धाय्फइगु अवस्था मदु । खय्त ला नेपालय् न्हापांनिसें हे छगू टुर क्वचाय्धुंकाः आः छु जुइ धइगु लिसः सुंयाके मदइगु खः । छाय्धाःसा नेपाःया क्रिकेटय् गबलें नं “बार्षिक क्यालेण्डर” दय्की मखु । थ्व नेपाःया नितिं विडम्बना खः ।
थौंकन्हय् ला झन् नेपालय् क्रिकेटया संघ हे मदु । आइसीसी मार्फत विदेशी टिमं पहल याःसा जक नेपाः म्हितेदइगु बाध्यता दु । उकिं अन्तर्राष्ट्रिय टि–ट्वान्टी मान्यता प्राप्त याःसां नं उकियात पाय्छिकथं छ्यलेपूmगु मदु । एकदिवसीय मान्यताया हालत नं अथे हे जुइगु जकं मखुला धइगु ग्याचिकु दु । नेपालं आः प्यदँया नितिं एकदिवसीय मान्यता प्राप्त याःगु दु । तर बांलाःगु ग्वसाः ग्वय् मफुत धाःसा एकदिवसीय मान्यता प्राप्त जुल व वन जक धाय्गु जुइ ।
