न्हापांगु मातृभाषा (राष्ट्रभाषा) पत्रकारिता सम्मेलन क्वचाल
लहनान्युज | अनलाथ्व द्धितीया ११३८ (मे १७ २०१८)
नेपालय् हे न्हापांखुसि २६ गू आदिवासी जनजातिया मातृभाषया पत्रकारतय्गु ब्वति दुगु संघीय संरचनाय् संचार मातृभाषा पत्रकारिताया आधार धइगु नारा थ्वयेका नेवाः पत्रकार राष्टिय दबू राष्ट्रिय दबूया ग्वसालय् अले नेपाल आदिवासी जनजाति पत्रकार महासङ्घया संयोजनय् नेसं ११३८ अनलाथ्व पारु (सन् २०१८ मे १६) कुन्हु तःजिक क्वचाःगु दु ।
येय् जूगु उगु सम्मेलनयात ऐतिहासिक सम्मेलन खः धकाः सरोकारवालातय्सं धयादीगु दु । नेपालय् वंगु ९३ दँ न्ह्यःनिसें न्ह्यानाच्वंगु नेपाःया मातृभाषाया पत्रकारितायात अझ सशक्त याना यंकेमाःगुलिं उगु कथंया सम्मेलन यानागु खः धकाः धाःगु दु ।
मातृभाषा पत्रकारिता सम्मेलनय् ब्वति कयादीपिं २६ गू आदिवासी जनजाति समुदायया पत्रकारपिं ः
१) नेवाः, २) मगः, ३) राई, ४) तामाड, ५) लिम्बु, ६) थारु, ७) गुरुड, ८) शेर्पा, ९) बराम, १०) उराँब, ११) धिमाल, १२) माझी, १३) ताजपुरिया, १४) किसान, १५) दुनवार, १६) जिरेल, १७) सुनवार, १८) थामी, १९) ल्होमी, २०) कुमाल, २१) दराई, २२) चेपाड, २३) बान्तवा राई, २४) मुगाल, २५) मेचे २६) राजवंशी
सार्वजनिक जूगु घोषणा पतिइ न्ह्यथनातःगु बुँदात ः
१) नेपाःया संचार जगतय् आदिवासी जनजाति पत्रकारिताया न्यून उपस्थितियात नीति निर्माण तहलं समस्याया रुपय् आत्मसात् यायेमाःगु व उकिया समाधानया नितिं बहुआयामिक सकारात्मक पहल न्ह्यःने यंकेमाःगु
२) थौंकन्हय् गोरखापत्र न्हिपतिइ अभ्यास जुयाः वयाच्वंगु बहुभाषिक पत्रकारितायात समावेशी पत्रकारिताया छगू नमूनाया रुपं कयाः प्रत्येक प्रदेशया जनसंख्या, भाषा, सांस्कृतिक बाहुल्यताया आधारय् मातृभाषी संचारकःमिपिनिगु सक्रिय सहभागिता सुनिश्चित यायेमाःगु लिसें सरकारी संचार माध्यमय् मातृभाषा पत्रकारिता यानाः वयाच्वंगु जनशक्तिया पेशागत सुनिश्चितता कायम यायेमाःगु
३) नीति निर्माण तहलय् आदिवासी जनजाति पत्रकारपिनिगु प्रतिनिधित्व सुनिश्चित यायेमाःगु
४) नेपाली संचार माध्यमया अन्तर्वस्तुइ नेपाःया विविधता प्रतिविम्बित जुइमाःगु व उकिया नितिं समाचार कक्षय् आदिवासी जनजाति समुदायया समानुपातिक प्रतिनिधित्व जुइमाःगु
५) गैरमातृभाषी संचार क्षेत्रय् संलग्न आदिवासी जनजाति संचारकःमिपिन्त उगु क्षेत्रय् परिचालन जुइत प्रोत्साहित व आकर्षित यायेमाःगु
६) जनजाति संचारकःमिया क्षमता विकासया नितिं माःगु ज्याझ्वःत संचालन यायेमाःगु, ७) पत्रकारितायात समानता व सामाजिक न्याय, पहिचानया नितिं आदिवासी जनजातिं यानाः वयाच्वंगु आन्दोलनया अभिन्न अंकया रुपं आत्मसात् यायेमाःगु
८) आदिवासी जनजाति संचार पहलया नितिं विशेष सुविधा व प्रोत्साहनया व्यवस्था जुइमाःगु
९) राज्यं समानुपातिक व समानताया आधारय् अनुदान वितरण प्रणाली संचालन जुइमाःगु
१०) राज्यं राष्ट्रिय स्तरय् प्रत्येक दँ मातृभाषा पत्रकारिता दिवसया ग्वसाः ग्वयेमाःगु ।
मातृभाषा पत्रकारिताया विकासं प्रेस व अभिव्यक्ति स्वतन्त्रताया उच्चतम अभ्यास याकेगु व नेपाली पत्रकारिताया परिभाषायात व्यापकता प्रदान याइगु जूगुलिं आमसंचारय् फुक्कसिगु पहुँच सुनिश्चित यायेत च्वय् न्ह्यथंगु बुँदात कार्यान्वयनय् हयेत सम्बद्ध निकाययात आह्वान यानाच्वना धकाः नेवाः पत्रकार राष्ट्रिय दबूया नायः श्रीकृष्ण महर्जनपाखें घोषणा पौ सार्वजनिक यानादीगु खः ।
थौंसिबें ९३ दँ न्ह्यः धर्मादित्य धर्माचार्यं नेपालभाषां दक्ले न्हापां नेपाःया आदिवासी जनजातिया मातृभाषां पत्रिका पिथनादीगुलिं वय्कःया लुमन्तिइ दँय् दसं नेवाः पत्रकार राष्टिय दबूपाखें मातृभाषा पत्रकारिता दिवस बुद्ध जयन्तीया छन्हु न्ह्यः याना वयाच्वंगु खःसा मातृभाषाया सवालय् सकल आदिवासी जनजाति छगू हे थासय् च्वना सहलह ब्याका न्ह्यः वनेगु यायेमाः धकाः दबूपाखें न्हापांगु मातृभाषा पत्रकारिता सम्मेलन ग्वसाःग्वःगु खः ।
सम्मेलनं धर्मादित्यं सुरु यानादीगु नेपालभाषा पत्रकारितायात हे न्हापांगु आदिवासी जनजाति पत्रकारिताया निंितं पलाः खः धकाः मातृभाषा पत्रकारिता सम्मेलनं स्वीकार याःगु दुसा आः मातृभाषा पत्रकारिता दिवस तकं राज्यं हनेमाः धकाः तकं माग याःगु दु ।
उद्घाटन समारोह
बुधवाः येँय् २६ गू जनजातिया मातृभाषाया पत्रकारतय्त दुथ्याका न्हापांगु मातृभाषा पत्रकारिता सम्मेलन याःगु खःसा उगु सम्मेलनया उलेज्या येँ महानगरपालिकाया मेयर विद्यासुन्दर शाक्यं यानादीगु खः । नेवाः पत्रकार राष्टिय दबूया केन्द्रीय नायः श्रीकृष्ण महर्जनया सभापतित्वय् जूगु उगु ज्याझ्वलय् सम्मेलनया कजि नापं दबूया न्वकू नृपेन्द्रलाल श्रेष्ठं लसकुस न्वचू बियादीगु खःसा ज्याझ्वःया बारे मूछ्याञ्जे सुनिल महर्जनं यानादीगु खः ।
छ्याञ्जे केके मानन्धरं संचालन यानादीगु उद्घाटन समारोहलय् पाहां कथं प्रदेश नंं ३ या सांसद राजेश शाक्य, नेपाल प्रेस कान्सीलया दुजः सुभेक्षा विन्दु, नेपाल आदिवासी जनजाति पत्रकार महासंघया नायः डण्ड गुरुड, दबूया सल्लाहकारपिं नरेशवीर शाक्य, राजा शाक्य, सुरेश किरण मानन्धर, सुजिप बज्राचार्य, नेपाल पर्यटन बोर्डया कृष्ण अर्याल लगायतपिं जुयादीगु खः ।
सल्लाहकार सुजिप बज्राचार्य, फोनिजया नायः डण्ड गुरुड, नेपाल प्रेस काउन्सीलया दुजः सुभेक्षा विन्दु, पर्यटन बोर्डया कृष्ण अर्यालपिन्सं भिंतुना न्वचू बियादीगु खः । ज्याझ्वलय् येँ महानगरपालिकाया प्रमुख विद्यासुन्दर शाक्यं मातृभाषा पत्रकारिता यानादीपिं संचारकःमित छप्पँ छधी जुया मवन धाःसा थुगु आन्दोलन न्ह्याकेत थाकुइ धकाः धयादिल ।
वय्कलं मातृभाषा व विपिया विकासया व विस्तारया नितिं येँ महानगरपालिका न्ह्याबलें तयार दु धयादिल । ज्याझ्वलय् मेम्ह पांहा प्रदेश नम्बर ३ या सांसद राजेश शाक्यं मातृभाषा सम्वन्धी ऐन दयेकेगु इलय् मातृभाषाया पत्रकारतय्गु सुझाव नं कायेगु जुइ धयादिल । अथे हे संचार नीति व समानुपातिक विज्ञापनया सवालय् मातृभाषाया पत्रकारपिन्त बः बिइमाः धकाः धयादिल ।
