न्हुछेकाजीया ‘श्रद्धाञ्जली’ सफू पितब्वज्या
लहनान्युज | ञंलाथ्व पारु ११३९ (सेप्तेवर १ २०१९)
समाजसेवीलिसें येँ महानगरपालिकाया वडा ल्याः १८ वडाध्यक्ष न्हुछेकाजी महर्जनया च्वसां पिदंगु बाखं मुना सफू ‘श्रद्धाञ्जली’ सामुदायिक अध्ययन केन्द्रया ग्वसालय् छगू ज्याझ्वःया दथुइ पितब्बज्या जूगु दु ।
उगु ज्याझ्वःया बिशेष पाहाँपि येँ महानगरपालिकाया प्रमुख बिद्यासुन्दर शाक्य व ३ नं. प्रदेशया सांसद बसन्त मानन्धरं मंकाःकथं पितब्बज्या यानादीगु खः ।
विशेष पाहाँ प्रमुख शाक्यं वडाध्यक्ष धइपिं ब्यस्त जुयाः नं च्वमि महर्जनं अति व्यस्तताया बाबजुद नं बाखं च्वयाः सफू पिथनेगु धइगु तसकं च्वछाय्बहःगु खँ धयादिसे नेवाःतसें थथेहे कुतः यानावन धाःसा नेपालभाषाया साहित्य ख्यः विकास जुयावनीगु खँ कनादिल ।
अथेहे, नेवाः देय् दबूया नायः नरेश ताम्रकारं नेपालभाषा म्वाकातय्त नेवाः लागाय् स्थानीयभाषाया ल्याखं ब्वनेकुथिइ अनिवार्य याकेत येँ महानगरपाखेँ प्रमुखं हे पलाःन्ह्याकादीत इनाप यानादीगु दु ।
ज्याझ्वलय् वरिष्ठ बाखंच्वमि राजा शाक्य, ज्यापु महागुथिया नायः राजभाइ जकःमिपिन्सं नं नुगः खँ तयादीगु खः ।
सामुदायिक अध्ययन केन्द्रया ग्वसालय् न्ह्याःगु उगु ज्याझ्वलय् संस्थाया नायःलिसें च्वमि न्हुछेकाजीया सभाध्यक्षताय् जूगु खःसा नानीहेरा महर्जनं न्ह्याकादीगु खःसा धर्मशोभा तुलाधरं लसकुस यानादीगु खः ।
बुखँ : नेवाः सुचना केन्द्र किपा : राजेन्द्र रंजित
