प्रधानमन्त्री केपी शर्मा ओलीं शुक्रबाः बहनि मन्त्रिपरिषद पुनर्गठन यानादिल । पुनर्गठित मन्त्रिपरिषद् स्वम्ह उपप्रधानमन्त्रीलिसें १२म्ह मन्त्री निम्ह राज्यमन्त्री जुयादि ।

पुर्नगठित मन्त्रिपरिषद् विष्णु पौडेल उपप्रधानलिसें अर्थ, रघुवीर महासेठ उपप्रधानमन्त्रीलिसें परराष्ट्र व राजेन्द्र महतो उपप्रधानलिसें शहरी विकास मन्त्री जुयादिल । वय्कपिन्सं म्हिगः हे राष्ट्रपति विद्यादेवी भण्डारीपाखें पद लिसें गोपनियताया सपथ कयादिल ।

अथेहे वसन्त नेम्वाङ भौतिक पूर्वाधार लिसें यातायात, कृष्णगोपाल श्रेष्ठ शिक्षा व लीलानाथ श्रेष्ठ कानून मन्त्री हे यथावत जुल । शेरबहादुर तामाङयात स्वास्थ्य मन्त्रालयया भाला बिउगु दु । जसपापाखें महतोबाहेक ७म्ह मन्त्री व २म्ह राज्यमन्त्री जुयादिल । शरतसिंह भण्डारी ऊर्जा, जलस्रोत तथा सिंचाई, अनिल झा खानेपानी तथा सरसफाई, लक्ष्मणलाल कणर् भूमि व्यवस्था, सहकारी तथा गरिबी निवारण मन्त्री जुयादिल ।

अथेहे विमल श्रीवास्तव श्रम, रोजगार लिसें सामाजिक सुरक्षा, उमाशंकर अरगरिया संस्कृति पर्यटन तथा नागरिक उड्यन, चन्दा चौधरी महिला, बालबालिका तथा जेष्ठ नागरिक, एकवाल मियाँ युवा तथा खेलकुद मन्त्री जुयादिल । अथेहे चन्द्रकान्त चौधरी ऊर्जा व रेणुका गुरुङ महिला बालबालिका तथा जेष्ठ नागरिक राज्यमन्त्री जुयादिल । उपेन्द्र यादवयात त्वःता विमल श्रीवास्तव, उमाशंकर अरगरिया व रेणुका गुरुङ मन्त्री जुइत ताःलाःगु खः ।

थुखे प्रधानमन्त्री ओलीं रक्षा, गृह, पर्यटन, सञ्चार, सामान्य प्रशासन, कृषि व उद्योग वाणिज्य तथा आपूर्ति मन्त्रालय् थःम्ह हे भाला काःगु दु ।

Categorized in राजनीति