सरकारं विद्युतीय राहदानी लागू याःगु लिसें न्हूगु राहदानी दयेकिपिनि भीड अप्वःगु दु ।

थौं सुथय्निसें परराष्ट्र मन्त्रालय अन्तर्गतया राहदानी विभागय् सर्वसाधारणया भीड अप्वःगु खः । वैदेशिक लजगाय् वनिपिं व विदेशं नखःचखः हनेत वःपिं लिहाँवनेन्ह्यः विद्युतीय राहदानीया नितिं विभागय् ताहाकःगु लाइन च्वंगु खनेदूगु खः ।

सरकारं मंसिर १ गते निसें विद्युतीय राहदानी लागू याःगु लिसें न्हूगु राहदानी दयेकेगु व नवीकरणया नितिं सर्वसाधारणया भीड जूगु विभागं न्ह्यथंगु दु  । थ्वयान्ह्यः वंगु असोज निगूगु वालय् नं विभागय् छुं ई राहदानी दयेका वःपिनि भिड जूगु खः  ।

उगु इलय् थ्यंमथ्यं छवा सुथ न्हापां हे राहदानी दयेकेत सर्वसाधारण लाइनय् च्वंगु खः । कोरोना संकटया हुनिं विदेश वयेवनेगु म्हो जूगुलिं थ्यंमथ्यं वंगु निदँ राहदानी दयेकिपिन ल्याः म्हो जूगु विभागं न्ह्यथंगु दु ।

आः कोभिड खोप अभियान व कोभिड विरुद्धया सावधानी अप्वःगु लिसें अवस्था सहज जूगुलिं नं न्हूगु राहदानी दयेकिपिनि अप्वःगु विभागया अधिकारीतय् धापू दु ।

न्हूगु विद्युतीय राहदानी बिइगु न्ह्यागु लिसें जिल्लाय् उगु सेवा चूमलाबलय् देय्यंकया सेवाग्राही विभागय् वया ताः ई लाइन च्वने बाध्य जूगु खः ।

Categorized in राष्ट्रिय