न्हूदँया पाः काइपिं म्ह्वः जुयावनाच्वन
लहनान्यूज सम्वाददाता | कौलागा दशमि ११३६ (अक्टोबर २५ २०१६)
यलय् न्हूदँ समारोहया पाः काइपिं म्ह्वः जुया वनाच्वंगु धाःगु दु ।
न्हूदँ नेपाल सम्वत ११३७या ज्याझ्वःया जानकारी बीत थौं यलय् ग्वसाः ग्वःगु पत्रकार सम्मेलनय् नेपाल भाषा मंकाः खलः, यलया नायः ऋषिप्रसाद श्रेष्ठं निदँ लिपाया समारोहया नितिं यलय् न्हूदँया समारोहया नेतृत्व काइपिं खने मदनिगु परिस्थितीयात कुलादिल । प्यंगू द मंकाः समाजं पालंपाः नेतृत्व काइगु कथं निदँ लिपा पाः काइम्ह सु धइगु क्वःमज्यूगुलिं आकिवंयात हे समस्या वयेफुगु धयादिल ।
लिपा पाः काइगु संस्थाया प्रतिनिधि वर्तमान कार्यसमितिया छ्यान्जे च्वनीगु परम्परा कथं आकिवंया समारोह समिति गठन जुइबलय् हे निदँ लिपा पाः काइम्ह निश्चित जुइधु्ंकेमाःगु श्रेष्ठं जानकारी बियादिल ।
थुगुसी धाःसा ल्वहँकःमि समाजपाखें मोतीलाल शिल्पकार नायः ल्यःगु खःसा आकिवं नेतृत्वया पाः काइगु संस्थाया ल्याखं स्यस्यः समाजपाखें सुवर्णमान अमात्य छ्यान्जे च्वनादीगु खः ।
- थुगुसीया न्हूदँया ज्याझ्वः सार्वजनिक
थौं यलय् ग्वसाः ग्वःगु पत्रकार सम्मेलनय् थुगुसीया न्हूदँया समारोहया ज्याझ्वः नं सार्वजनिक याःगु दु ।
पत्रकार सम्मेलनय् न्हूदँ समारोह समिति ११३७ या नायः मोतीलाल शिल्पकारं जानकारी बियादीकथं न्हूदँया दिं कछलाथ्व पारु ११३७ या दिनस सुथय् यलया मंगलय् नं बाजंगाजंलिसेंया र्यालि न्ह्याइगु जूगु दु । उगु र्यालीं यलया सापारु रुट चाःहिलाः क्वचाइगु जूगु दु ।
ज्याझ्वःया उलेज्या प्रधानमन्त्री पुष्पकमल दाहालं यानादीगु जूगु दुसा र्यालि धुंकाः सिरपाः इनेगु ज्याझ्वलय् उद्योगमन्त्री नवीन्द्रराज जोशी झाइगु समारोह समितिं न्ह्यथंगु दु ।
समितिं न्ह्यथंकथं र्यालीइ ब्वति काइगु बाजं खलः, त्वाः, संघसंस्था आदियात गोलाप्रथाकथं यल उपमहानगरपालिकापाखें छसिकथं ५द्वः, ३द्वः व २द्वः तका सिरपाः नं बीत्यंगु दुसा हःपाः कथं मेगु १५ ब्वतिमिपिन्त द्वःछि तकाया सिरपाः नं बीत्यंगु दु । व हे कथं व्यानर लिसें र्यालीइ ब्वति काइगु खलःपुचः, मिसा पुचः, संघसंस्थायात नेपालभाषा मंकाः खलः यलपाखें मोतीलाल शिल्पकारया नामं नीस्वनातःगु ५द्वः, ३द्वः व २द्वः तकाया मोति सिरपाः व दसिपौ नं बीगु जूगु दु ।
वयां न्ह्यः, न्हू दँ समारोह समिति ११३७ अन्तर्गत रोट्र्याक्ट क्लब अफ ललितपुरया ग्वसालय् कौलागा आमै ११३६ या सनिलय् सीइता मतयाः जुइत्यंगु दु । व हे कथं न्हूदँया दिनय् कछलाथ्व पारु कुन्हु सुथय् नेपाल विद्यार्थी दबूया ग्वसालय् मोटर साइकल र्याली नं जुइत्यंगु दु ।
Categorized in राष्ट्रिय
