न्हूदँ ११३७ या नायः भीमसेनदास
न्हूदँ समारोह समिति ११३७ या नितिं नेपाली कांग्रेसया नेता लिसें सांसद भीमसेनदास प्रधानयात नायः ल्यःगु दु ।
 
 
न्हूदँ समारोह समितिया नेवाः न्ह्यलुवाः लक्ष्मीदास मानन्धरया छेँय् थौं च्वंगु मुँज्यां सांसद प्रधानयात नायः ल्यःगु खः । न्हूदँ समारोह समिति ११३६ या नायः डा. महेशमान श्रेष्ठं सल्लाहकारपाखेंया सल्लाह कथं धकाः प्रधानया नां प्रस्ताव यायेधुकाः मुँज्यां अनुमोदन याःगु खः ।
 
डा. श्रेष्ठं न्हूम्ह नायः प्रधानयात खादां न्ययेकाः भिन्तुना देछानादीगु खः ।
 
न्हूदँ समारोह समितिया नायःया पदभार लःल्हानाकासें प्रधानं नेवाःत राजनीति ख्यलं लिचिलाच्वंगुलिं हे झनझन ल्यूने लाना वनाच्वंगु धयादिल । पद कायेगु थासय् लिचिलेगु बानीं थौं नेवाःत राजनैतीक लिसें प्रशासनिक ख्यलय् गनं हे खनेमदुगु वयकःया धापू खः ।
 
नेवाःतयत छथाय् मुंकाः थःगु अधिकारया संघर्ष न्ह्याकातयेगु सोचं झी पुर्खां न्ह्याकावंगु नेपाल सम्वतया आन्दोलनयात ई कथं झीसं निरन्तरता बीमाःगु पुलांम्ह नायः डा.श्रेष्ठं धयादिल ।