न्ह्यइपुक्क क्वचाःगु विश्वकप क्रिकेट २०१९
–प्रजीत शाक्य
 
विश्वकप क्रिकेटया फाइनलय् इङ्गल्याण्ड व न्यूजिल्याण्ड थ्यनेवं विश्वं न्हूम्ह च्याम्पियन प्राप्त याइगु पक्का जूगु खः । फाइनल कासाय् थःम्हेस्यां हे इतिहास दय्कल, गुकी इङ्गल्याण्डया न्हापांगु विजयया चर्चायात हे बुलुका बिल । विश्वकप क्रिकेटया फाइनलय् न्हापांखुसी ‘टाइ’ जुल । व लिपाया विश्वविजेताया छिनोफानो याय्त जूगु सुपर ओभरय् नं ‘टाइ’ जुल ।
 
 
थजाःगु स्थितिइ अप्वः चौका व छक्का थ्वाःगु टिम विजेता जुइगु नियमकथं घोषणा यात । थजाःगु नियम व्यवहारय् मवःगुलिं म्होजक मनूतय्सं स्यू । उगु नियमकथं इङ्गल्याण्डयात विजेता घोषित यात । क्रिकेटया जननी इङ्गल्याण्ड न्हापांखुसी विश्वविजेता जुल व विश्व क्रिकेटं न्हूम्ह च्याम्पियन प्राप्त यात ।
 
 
खय्त ला इङ्गल्याण्डयात कासा न्ह्यः हे विश्वकप उपाधिया मू दावेदारकथं स्वयाच्वंगु खः । आइसीसी वरियताय् शीर्ष स्थानय् दु, इङ्गल्याण्ड । सन् २०१७य् च्याम्पियन्स ट्रफिया सेमीफाइनलय् बुइधुंकाः इङ्गल्याण्ड एकदिवसीय श्रृंखलाय् बुगु मदुनि । थ्व हे दथुइ इङ्गल्याण्डं निक्वः अष्ट्रेलिया, न्यूजिल्याण्ड, भारत व श्रीलंकायात एकदिवसीय श्रृंखलाय् बुकूगु खः । थुगुसी वेष्ट इण्डिज विरुद्धया श्रृंखला २–२या ल्याखं बराबरी म्हितूगु जक इङ्गल्याण्डया कमजोर लिच्वः खः । अथे हे, घरेलु कासाख्यः व स्वकुमि इङ्गल्याण्डया नितिं दकलय् तःधंगु ‘प्लस प्वाइन्ट’ खः ।
 
 
अथे ला लिग चरणया कासाय् इङ्गल्याण्डया ब्वज्या अपेक्षाकथं बांलाः मजू । सेमीफाइनलतकया यात्रा थथ्याःक्वथ्याः जुल । भारत व न्यूजिल्याण्ड विरुद्धया लिपांगु निगू लिग कासाय् अःपुक्क त्याय्धुंकाm जक इङ्गल्याण्ड अन्तिम चरणय् थ्यनेत ताःलाःगु खः । सेमीफाइनलय् अष्ट्रेलियायात एकपक्षीयकथं बुकूगु इङ्गल्याण्डया नितिं न्यूजिल्याण्ड विरुद्धया उपाधि कासा धाःसा ‘नँया बजि न्ह्यय्गु’थें जुल ।
 
 
४६न्हुया क्रिकेटया महाकुम्भयया ‘क्लाइमेक्स’ अविश्वसनीय जुल । तःक्वःमछि न्यूजिल्याण्डयात भाग्यं साथ मब्यूगुलिं जक इङ्गल्याण्ड च्याम्पियन जुइत ताःलाःगु खः धाःसां पाइमखु । उगु फाइनल कासाय् भाग्यया साथ नं माः धइगु नजीर स्थापित जुल । भाग्यमानी जूगु न्हापांगु दसू इङ्गल्याण्डयात स्वंगू बलय् गुंगू रन माःगु इलय् निगूगु रन पूवंकेत डाइभ याःम्ह स्टोकयात लानाः बल सीमारेखां पिहांवंगु खः ।
 
 
छगू रन जुइमाःगु उगु बलय् इङ्गल्याण्डयात खुगू रन प्राप्त जुल । अझ साइमन टफेलं अनफिल्ड अम्पायरं नियमकथं न्यागू रन बीमाःगुली छगू रन अप्वः बियाः गल्ति याःगु धाय्धुंकाः फाइनलय् अम्पायरपाखें तःधंगु गल्ति जूगु पिहांवल ।
 
 
व ला फाइनलय् इङ्गल्याण्डया भाग्यमानी जूगु निगूगु अवसर खः । उगु घटनाया गुंगू बल न्ह्यः न्यूजिल्याण्डया ट्रेन्ट बोल्टं स्टोकया क्याच काय्धुंकूगु खः । तर वय्कलं सन्तुलन तंकूगुलिं सीमारेखाय् दुगु खिपः न्हुल । गुकिया कारण स्टोक आउट जुइमाःगु स्थितिइ न्यूजिल्याण्डं थप खुगू रन बीमाल ।
 
 
अथे ला इङ्गल्याण्ड ट्रफिया हकदार मखु धाय् नं मज्यू । इङ्गल्याण्डं विश्वकप च्याम्पियन टिमकथं हे म्हितल । इङ्गल्याण्डया नितिं थुगु उपाधि भावनात्मक नं खत । प्यदँ न्ह्यः इङ्गल्याण्डं तुयूगु बलया क्रिकेटय् नं सुस्त गतिइ परम्परागत शैली नालाः म्हितीगु खः । गुकिं यानाः एकदिवसीय क्रिकेटय् इङ्गल्याण्डया नां गबलें सम्मानकथं काय्गु मयाः । सन् २०१५य् विश्वकप चरणं पिहां वनेधुंकाः इङ्गल्याण्डं अपमानित जूगु महसूस यात । व लिपा इङ्गल्याण्डं थःगु हे छेँय् जुइगु विश्वकप त्याकेत प्यदँ न्ह्यःनिसें तयारी न्ह्याकल, व नं थःगु क्रिकेट म्हितेगु शैलीयात त्वःताः ।
 
 
इङ्गल्याण्डं लिपांगु विश्वकपलिपा फुक्क ध्यान एकदिवसीय व टि–२० थेंजाःगु चिहाकःगु संरचनाया क्रिकेटय् ब्यूगु खः । प्रशिक्षक ट्रेभर बेलिस व कप्तान इयोग मोर्गनं टिमय् आक्रामक, सकारात्मक, जोखिम काय्गु मनस्थितिया कासा जाय्काबिल । उगु हे शैलीइ म्हितेफूपिं कासामित ल्यल । तःक्वःमछि ताःमलाःसां नं उमिके विश्वास कायम हे यानातल । व लिपा जक इङ्गल्याण्डया टिमं चमत्कार क्यन । इङ्गल्याण्डं लत्या ताःहाकःगु विश्वकपय् प्रतिकूल इलय् नं आक्रामक शैलीं म्हितेगु त्वःमतल ।
 
 
 
थुकिं विश्वकपथें जाःगु तःधंगु कासा छन्हुं त्याइमखु । कासाय् सफल जुइत दीर्घकालीन रणनीति व पूर्ण प्रकृयां जक सम्भव जुइ धइगु सन्देश नं ब्यूगु दु । थ्व सफलतां इङ्गल्याण्डय् म्हो जुजुं वनाच्वंगु क्रिकेटया क्रेज हाकनं लिहां वइगु अपेक्षा याःगु दु । क्रिकेटया जननी राष्ट्र खः, इङ्गल्याण्ड । इङ्गल्याण्ड क्रिकेट कासायात कयाः गर्व नं याइ, तर न्हूगु पुस्ता क्रिकेटपाखें तापाना वनाच्वंगु अवस्था खः । इङ्गल्याण्ड सेमीफाइनल थ्यने न्ह्यःतक बेलायतया स्वकुमितय्त विश्वकप क्रिकेटं स्वयां मिस्तय्गु विश्वकप फुटबल कासां सालाच्वंगु खः । विश्वकपय् रंगशाला नं एशियाली स्वकुमि व एशियाली मूलया बेलायतीं जक जायाच्वंगु स्पष्ट खनेदु ।
 
 
उखे उपविजेत न्यूजिल्याण्डं विश्वकपय् न्ह्याबलें बांलाक्क म्हितेगु याः । न्यूजिल्याण्डं थुगुसी नं उपाधि भिडन्तय् लगातार निक्वःखुसी फाइनल म्हितल । थुगुसी नं न्यूजिल्याण्डं ट्रफि त्याके मफुत । अथे खःसां फुक्कसिगु मन धाःसा त्याकूगु दु । मुस्किलं सेमीफाइनलय् थ्यंगु न्यूजिल्याण्डं पाय्छि इलय् थःगु कासाया स्तर थकाल । कप्तान केन विलियम्सन विश्वकपया नापनापं क्रिकेटया सुपरस्टार जुल ।
 
 
प्यखेरं चौका व छक्काया नियमया विरोध जुयाच्वंगु इलय् नं न्यूजिल्याण्डं तःधंगु कासाया भावना क्यनाः हारयात स्वीकार यात । थःगु पक्षय् मखुगु निर्णय जूसां नं उकियात विवादय् महल । न्यूजिल्याण्डया प्रशिक्षक गेरी स्टिगं थुलि जक धाल, ‘मेगु संस्करणनिसें थजाःगु परिस्थिति वःसा मंकाः विजेता दय्कूसा पाय्छि जुइ ।’ उकिं आः न्यूजिल्याण्डया चर्चा विश्वकप विजेता इङ्गल्याण्ड स्वयां म्हो मजू ।
 
 
थुगुसी विश्वकपय् रनया वर्षा जुइगु अपेक्षा यानातःगु खः । ख नं खः, लिपांगु स्वदँ इङ्गल्याण्डया पीच ब्याट्सम्यानया नितिं स्वर्ग हे जुयाच्वंगु खः । इङ्गल्याण्डय् हरेक टिमं स्वसःगू रन याउँक हे दय्की । उकिं थुगुसी नं छगू पालीइ न्यासः रन दय्की धइगु भविष्यवाणी जुल, तर न्ह्यानाच्वंगु विश्वकपय् ३५०गू रन स्वयां च्वय्या स्कोर प्यक्वःतक दय्कल । अफगानिस्तान विरुद्ध ३९७गू रन दय्काः इङ्गल्याण्डं दकलय् अप्वः स्कोर दय्कूगु खः । उगु कासाय् इङ्गल्याण्डया इयोन मोर्गनं कीर्तिमानी १७गू छक्का थ्वाःगु खः ।
 
 
बेलायतय् कासाया सुरुवातय् हे लकस ख्वाउँ । गुकिं यानः फ्लाय्ट व सुख्खा पीच छक्वलं नाइसे व सुस्त जुल । विश्वकप क्रिकेट ब्याट्सम्यानया जक मखुसे जिमिगु नं खः धइगु हौसला बलरतय्के वल । अथेखःसां विश्वकपय् टस त्याइगुयात बच्छि कासा त्याइगु सरहथें जुइगु खः । छु नं टिमं पाय्छिगु लक्ष तकं प्राप्त याय्मफुत । उकिं फुक्क टिमया नितिं अःपूगु समीकरण जुयाबिल, ‘टस त्याकाः न्हापां ब्याटिङ याय्गु ।’ इङ्गल्याण्डय् न्हापां ब्याटिङ्ग याःगु टिमयात तःधंगु फाइदा जूगु खनेदु । विश्वकपथें जाःगु तःधंगु कासाया दबाब, वर्षाया खतरा दुगु लकस व कासा न्ह्यानाच्वँच्वं पीच सुस्त जुजुं वनीगु हुनिं नं फुक्क टिमं न्हापां हे ब्याटिङ्ग याय्गु यय्कूगु खनेदु ।
 
 
थुगु विश्वकपयात प्रतिस्पर्धात्मक दय्केत आइसीसीं १४गू टिमपाखें १०गू याःगु खः । अथे हे विश्वकपय् खनेदइगु टिम जिम्बाबे, स्कटल्याण्ड व आयरल्याण्ड नं इङ्गल्याण्ड वय् मखन । लिग चरणया मध्य इलय् सेमीफाइनल म्हितीगु प्यंगू टिम सीदय्धुंकूगु खः । इङ्गल्याण्ड श्रीलंकालिसे बुइधुंकाः कासाया अन्तिम प्यंगुलिइ थ्यनीगु टिमय् धाःसा छुं भचा थथ्याःक्वथ्याः जुइगु खःला धइथें जुल, अथेखःसां अन्तय् न्ह्यःने वनाच्वंगु भारत, अष्ट्रेलिया, इङ्गल्याण्ड व न्यूजिल्याण्ड हे नकआउट चरणय् थ्यन ।
 
 
लिग चरणय् अष्ट्रेलिया व भारत उपाधिया मू दावेदारकथं न्ह्यःने वःगु खः । अष्ट्रेलिया सेमीफाइनलय् इङ्गल्याण्डया सर्वश्रेष्ठ प्रदर्शनया धरापय् लाःगु खः । न्यूजिल्याण्ड विरुद्धया सेमीफाइनलय् सुरुया १९गू बलय् न्यागू रनय् स्वंगू विकेट तंके न्ह्यः भारत विश्वकप ट्रफिया लिक्क लाःगु अनुमान यानातःगु खः ।