२०८० चैत्र १६, शुक्रबार

पत्रकारिताय् लैङ्गिक संवेदनशीलता ज्याझ्वः

नृपेन्द्रलाल श्रेष्ठ | चिल्लागा पंचमी ११३८ (मार्च २२ २०१८)

नेवाः पत्रकार राष्ट्रिय दबू, मिसा कवःया ग्वसालय् थौं छःगु १०८ क्वःगु अन्तर्राष्ट्रिय नारी दिवसया लसताय् मिसा तयेत जुइगु विभेदया अन्त्यया लागि पत्रकारिताय् लैङ्गिक संवेदनशीलताया बिषयलय् छगु अन्तरक्रिया ज्याझ्वः जुगु दु
 
उगु ज्याझ्वलय् नेपाल भाषा टाइम्सया सम्पादक नाप वरिष्ठ पत्रकार सुरेशकिरण मानन्धरं लैङ्गिक विभेद अन्त्यया लागि सञ्चारमाध्यमं महत्वपूर्ण भूमिका म्हिते फइगु धासेें लैङ्गिक संवेदनशीलताया विषयलय् सञ्चारमाध्यम उदाहरण जुया पिहा वये माःगु खँय् बःबियादील ।
 
वय्कलं सञ्चारमाध्यमय् मिसा तयेगु बुखँ कम जक थाय् दइगु धयादीसे सम्पादक मानन्धरं मिसा तयेगु बुखँ दुव्र्यवहार, बलात्कार व घरेलु हिंसा बांमलाःगु बुखँ जक सञ्चारमाध्यम थाये बियाच्वंगु, बांलागु बुखँय् अपेक्षा याये थें थाय् बिया च्वंगु मदुगु धका न धयादीगु खः ।
 
राससया पूर्व महाप्रबन्धक नाप क्रियाशील महिला पत्रकार मञ्चया उपाध्यक्ष निर्मला तुलाधर आचार्यं मिसा तयेत समाजं स्वइगु मिखा व मिसा पिन्त पेशागत संवेदनशीलता यात थुइके मफया हे पत्रकारिता त्वःता वनेत बाध्य जुया वनाच्वंगु धका धयादील । 
 
मिसा कवःया कजि रचना श्रेष्ठया सभाधक्ष्य जुगु उगु ज्याझ्वलय् रुबि श्रेष्ठं न्ह्याकादीगु खः ।
Categorized in राष्ट्रिय