पत्रकार दबूपाखें आदिवासी महासंघयात लसकुस
लहनान्यूज | पोहेंलाथ्व अष्टमि ११३७ (जनवरी ६ २०१६)
नेवाः पत्रकार राष्ट्रिय दबूपाखें नेपाल आदिवासी जनजाति महासंघया न्हूगु निर्वाचित कार्य समितियात लसकुस याःगु दु ।
दबुलिं म्हिगः यलय् छगू ज्याझ्वः यासें जनजाति महासंघयात लसकुसलिसें न्हूगु कार्यसमितिया कार्यकाल सफलताया भिंतुना नं देछाःगु खः । ज्याझ्वलय् महासंघया कार्यसमितिया न्हूपिं पदाधिकारीलिसें दुजःपिन्त नेवाः परम्परा कथं धौ सगं व ख्येँय् सगं ब्यूगु खः ।
दबूया नायः श्रीकृष्ण महर्जनया अध्यक्षताय् जूगु ज्याझ्वलय् न्वकू सुरजबीर बज्राचार्यं लसकुस यानादिल । अथे हे दबूया यल कचाया नायः सुरज ब्यन्जनकारं सुभाय् देछानादीगु खः ।
आदिवासीया हितय् मखुसा देयया हितय् नं जुइमखु
नुगः खँ तयेगु झ्वलय् आदिवासी जनजाति महासंघया न्हूम्ह नायः जगतबहादुर बरामं आः न्हूगु संविधान आदिवासी जनजातिया हितय् दयेकेगु खःसा व देयया हे हितय् मजुइगु दाबी यानादिल । न्हूम्ह नायः बरामं संविधान संशोधनया विरोध यासें संसद अवरुद्ध यानाच्वंपिन्त संसद सुचारु यानाबीत इनाप यानादिल ।
व हे कथं लसकुस न्वचुया झ्वलय् न्वकू सुरजबीर बज्राचार्यं महासंघया न्हापाया कार्यसमितिं आदिवासी जनजातिया अधिकार स्थापित यायेत न्ह्यमच्यूगु खँय् कुंखिनादिल । न्हूगु कार्यसमितिया नितिं थुगु हे विषय आः हाथ्या कथं दुगु खँ न्वकू बज्राचार्यं कुलादिल ।
दबूया नायः श्रीकृष्ण महर्जनं धाःसा महासंघया सक्रियतां संविधान संशोधनलिसें जनजातिया अधिकार स्थापित याये सम्भव जुइगु धयादिल । आदिवासी जनजातिया अधिकारया आन्दोलनय् महासंघयात पत्रकार दबूया नं साथ दइगु नायः महर्जनया धापू खः ।
Categorized in राष्ट्रिय
