पत्रकार दबूयात मेयर शाक्यया भिन्तुना
शोभा श्रेष्ठ | कछलागा चतुर्दशी ११४०
येँ महानगरपालिकाया मेयर विद्यासुन्दर शाक्यं नेवाः संचारमाध्यमया विकासया नितिं थम्हं फक्व ग्वाहालि यायेगु धयादीगु दु । थौं येँय् जूगु ज्याझ्वलय् न्ववासें मेयर शाक्यं स्थानीय सँस्कृतिया संरक्षणया नितिं स्थानीय मातृभाषाया संचारया नं विकास जुइमाःगु धयादिल ।
नेवाः पत्रकार राष्ट्रिय दबूया न्हूगु निर्वाचित केन्द्रीय कार्यसमितियात नापलासें मेयर शाक्यं स्थानीय मांभाय् नं सँस्कृतिया छगू ब्व खःगु धासें भायया विकास मजुइकं स्थानीय सँस्कृतिया विकास नं पूवंक जुइमफइगु धयादिल ।
स्थानीय सँस्कृतिया विकासया लागिं थनया पत्रकारपिन्सं नं महत्वपूर्ण भूमिका म्हितेमाःगुलिइ शाक्यं बः बियादिल ।
थःगु विगत लुमंकुसें मेयर शाक्यं न्हापा थः नं पत्रकार हे खःगु धयादिल । बुधबार साप्ताहिक व नेपालभाषाया न्हिपौ विश्वभूमिया नितिं थम्हं पत्रकारिता यानागु धासें शाक्यं नेवाः संचारमाध्ययमा अवस्था व समस्या थम्हं बांलाक हे थूगु धयादिल ।
ज्याझ्वलय् कामपा मेयर शाक्यं नेवाः पत्रकार राष्ट्रिय दबूया न्हूगु निर्वाचित केन्द्रीय कार्य समितियात कार्यकाल सफलताया भिंतुना बियादिल ।
ज्याझ्वलय् दबूया वरिष्ठ न्वकू नृपेन्द्रलाल श्रेष्ठं दबूया संगठनया स्वरुप, संगठन विस्तार, दबूपाखें जुया वयाच्वंगु ज्याखँया बारे जानकारी याकादिल । संगठनया अझ तःधंका यंकेगु व थुकियात अझ सुदृढ दयेकेगु नितिं थः योजनावद्ध दुगु धासें न्वकू श्रेष्ठं योजनाय् याकनं ज्या न्ह्याकेगु धयादिल ।
न्हापाया कार्यकालय् आदिवासी जनजाति पत्रकार महासंघलिसेया सहकार्यय् दबूपाखें न्हापांगु मातृभाषा पत्रकारिता दिवसया ग्वसाः ग्वयागु धासें वरिष्ठ न्वकू श्रेष्ठं व हे दिवसं नेपालभाषाया न्हापांगु पत्रिका पिथंम्ह धर्मादित्य धर्माचार्य नेपालया हे न्हापांम्ह मातृभाषी पत्रकार प्रमाणित जूगु जानकारी नं बियादिल ।
विद्यालय नं स्थानीय सरकारया अधिकार क्षेत्रय् वयेधुंकूगु अवस्थाय् धर्मादित्यया जीवनि पाठ्यक्रमय् दुथ्याकेत नं श्रेष्ठं मेयर शाक्ययात इनाप यानादिल । लिसें, धर्मादित्यया झ्वाता स्थापना यायेगु नितिं पहल यायेत नं श्रेष्ठं इनाप यानादिल ।
दबूया न्हूम्ह निर्वाचित नायः सुरजबीर बज्राचार्यं देय्न्यंकया नेवाः पत्रकारतयगु तथ्याङ्क मुंकेगु ज्या दबूपाखें यायेमाःगु धासें नेवाः पत्रकारया दक्षता थकायेगु ज्याय् दबू न्ह्यज्यायेगु धयादिल ।
Categorized in राष्ट्रिय
