पत्रकार दबूया महाधिवेशन व थुकिं ब्यूगु हसना
– बिराजकाजी राजोपाध्याय
देय्न्यंकया नेवाः पत्रकारतय्गु कुसा संगठन, नेवाः पत्रकार राष्ट्रिय दबूया महाधिवेशन तःजिक हे क्वचाल । दबूया स्वक्वःगु महाधिवेशनं नांजाःम्ह पत्रकारलिसें ग्यानपु स्टाइल व बुदिंया म्ये हाःम्ह लोकंव्हाःम्ह म्येहालामि तकं खःम्ह सुरजबीर बज्राचार्यया नेतृत्व न्हूगु ज्यासना पुचः नं ल्यल । गुलिं खँ अफवाह जुइफु, गुलिं खँ सत्य जुइफु, थीथी हुइनाभुइना चर्चा परिचर्चाया दथुइ छुं नं कथंया धेंधें बल्लाः मजुइक, सर्वसम्मतिं न्हूगु ज्यासना पुचः वल दबुलिइ । प्रक्रियागत ल्याखं यक्व त्रुटी दयेफु । लीमाःगु प्रक्रिया यक्व मलित जुइफु । दबूया महाधिवेशनं यक्वं खँ क्यनाथकल, यक्वं खँ स्यनाथकल ।
दबूया महाधिवेशन न्ह्यः जक मखु, महाधिवेशनया बन्द सत्र न्ह्यायेधुंकाः तक नं चुनावपाखें हे न्हूगु नेतृत्व ल्यइगु प्राय निश्चित खनेदयाच्वंगु खः । नायःया प्रत्यासी कथं साविक न्वकूद्वय सुरजबीर बज्राचार्य व नृपेन्द्रलाल श्रेष्ठया नां न्ह्यःने वयाच्वंगु खः । निम्हेसिनं नं नायः दावी यानाच्वंगु खः । दथुइ दथुइ सहमतिया यक्व हे खँ न्यनेदत तर जुइ धाःसा फूगु मखु । चुनाव जुइगु हे जुल धइगु प्राय निश्चित जुइधुंकूगु खः । उलि जक मखु, निम्हं प्यानल हे दयेकाः चुनावी ख्यलय् कुहांवइगु जुल धइगु तक खँ न्यनेदुगु खः । तर अन्तिम इलय् वयाः न्वकू नृपेन्द्रलाल श्रेष्ठ छपलाः लिचिलाबिल व संस्थाया हितया नितिं हाकनं छकः न्वकू हे च्वनेत सहमत जुयाब्यूबलय् बिना धेंधें बल्लाः सर्वसम्मतं हे न्हूगु ज्यासना पुचः ल्ययेगु ज्या जुल ।
निगू पक्ष धाये अथवा निम्हेसिया दथुइ जूगु सहमतिं एकताया सन्देश सकलसिया दथुइ व्हःगु दु । थ्व सहमति मजूगु खःसा छु जुइ, गज्याःगु सकारात्मक अथवा नकारात्मक सन्देश वनेफु धइगु खँ ला आः अनुमानया खँ जक जुल । तर छगू कथंया नकारात्मक लकस ला ब्वलंकीगु खँ सुनां नकारे यायेफइमखु । बिचाःया ल्याखं निगुलिं पक्षया छगू हे बिचाः । संस्थाया हे हित, पत्रकारतय्गु हकहितया लागिं संघर्ष यायेगु । राजनैतीक विचारधाराया ल्याखं नं वामपन्थी, दक्षिणपन्थी अथवा मेगु छुं नं पन्थीया खँ मखु । व्यक्तिगत इगो अथवा ल्वापु दुगु खःला धाये
धाःसा व नं मखु । थज्याःगु अवस्थाय् सहमति छाय् जुइमफुत, निगू प्यानल छाय् धइगु न्ह्यसः पिदंगु नं खः ।
थीथी कारण दयेफु, दबूयात थःगु योजना, थःगु भिजन कथं न्ह्यःने यंके धकाः निम्हेसिनं नेतृत्व दावी याःगु पक्कां खत । तर थन निम्हं प्यानल हे दयेकाः चुनावी धेंधें बल्लाखय् कुहांवनीबलय् निगू प्यानलयात कयाः मतदातात नं निगू पक्षय् ब्वदलीगु नं पक्कां खः । लोकतान्त्रिक अभ्यास खः, उकी वनाः छु हे पाइ धाइपिं नं दु । तर निम्हेसिया दथुइ छम्ह, निगू प्यानल दथुइ छगू प्यानल ल्यये हे माल । उकथं ल्ययेमालीबलय् चाय्कं मचाय्कं छगू पक्ष लीगु जु हे जुल । अले थुकिं संस्थायात दीर्घकालीन लिच्वः लाकेफु । संस्थायात निगू ध्रुवय् ध्रुवीकरण याइगु सम्भावना दनेफु अले थज्याःगु सम्भावनां हा कायेधुंकाः थज्याःगु हां तःधंगु रुप काइगु नं जुल ।
थुकिया नापं मेता खँ नं दु, गुगु खँयात कयाः चुनावी धेंधें बल्लाखय् वनीपिं सचेत जुइमाः । निगू पक्षया धेंधें बल्लाः जुयाच्वंबलय् स्वंगूगु पक्षं थःगु स्वार्थ पूवंकेफु । दबूया महाधिवेशनय् थज्याःगु लु खनेमदुगु नं मखु । निगुलिं पक्ष ब्यागलं ब्यागलं च्वनाः थःथःगु प्यानल दयेकेत, थःगु पक्ष बल्लाकेत व्यस्त जुल नं जुइ । अले नापं च्वनाः महाधिवेशनया तयारी नं याना हे च्वंगु दु । थुकिया दथुइ छुं छुं मनूत थःगु स्वार्थ पूवंकेगु तयारी नं जुल जुइ । उकिया नापं थुगुसी महाधिवेशन स्थगित यायेमाःगु बिचाः नं वःगु खः । महाधिवेशन स्थगित जुयां छु जुइ, लिपा हाकनं याये जि हे ज्यू धायेबलय् झीसं नेवाः देय् दबू नं लुमंकेमाः । नेवाः देय् दबूया महाधिवेशन छकः लिज्याःबलय् मेगु महाधिवेशनतक्क थ्यनेत न्हय्दँ ई काल । अज्याःगु हे अवस्था थुखे नं मजुइ गथे धाये ।
लोकतान्त्रिक अभ्यास हालाच्वंत्तले थज्याःगु थीथी ज्याखँत जूवनीगु सम्भावना दु, गुकिं संस्थायात दीर्घकालीन लिच्वः लाकेफु । न त ध्रुवीकरणं संस्थाया हित याइ, न त निगू पक्षयात सहमति याकेगु स्वयां द्यां च्वय् च्वनाः न्या बछि काइपिन्सं हे संस्थाया हित बिचाः याइ धकाः आशा यायेफइ । थज्याःगु अवस्थाय् न्वकू नृपेन्द्रलाल श्रेष्ठं छपलाः लिचिलाब्यूगु धइगु च्वछाय्बहःजू । वय्कःया त्यागया मूल्याङ्कन जुइ हे माः । नापं, थः नायःया हे प्रत्यासी जूसां हाकनं छकः न्वकू हे च्वनाः थः प्रतिद्वन्दी जुइत्यंम्ह सुरजबीर बज्राचार्यलिसे सहकार्य यानाः न्ह्याःवनेगु निर्णयं एकताया सन्देश नं ब्यूगु दु । जिपिं अलग मखु, एक हे खः, दबूया लागिं जिपिं एकतावद्ध जुयाः न्ह्याःवने धकाः एकताया सन्देश हे व्हःगु दु ।
थुकिया दथुइ, दबूया पदाधिकारी, दुजःपिन्सं थःत यक्व थासय् भिंकेमाःगु नं क्यंगु दु । नेवाः पत्रकार राष्ट्रिय दबू धइगु राष्ट्रिय संगठन खः । थुगु संस्थां देय्न्यंकया नेवाः पत्रकारतय्गु प्रतिनिधित्व यानाच्वंगु दु । थुगु संस्थाया पदाधिकारीपिन्सं न्ववाःगु धइगु सकल नेवाः पत्रकारतय् सः जुयाबी । व ल्याखं स्वयेबलय् दबूया पदाधिकारीपिन्सं थःत न्ह्यब्वयेगु शैलीया विकास यायेमाःगु खनेदु । वन्द सत्रय् पदधिकारीपिनि प्रस्तुतिइ खनेदुगु कमजोरी वय्कःपिं थम्हं हे महसूस ला याःगु दु । व ल्याखं थःत विकास नं यानायंकेमाल । उकिया नापं संस्थाया प्रक्रियागत खँय् नं दबुलिं प्रोफेसनालिज्म विकास यायेमाः ।
आपाः धइथें नेवाः संघसंस्थात सहमतिया नामय् मौखिक रुपं जक न्ह्याःवनाच्वंगु दु । गुलिखे संस्थाया ला माइन्यूट च्वयेगु तक नं चलन मदु । थज्याःगु अवस्था नेवाः पत्रकार राष्ट्रिय दबू दुने दये हे मज्यू । नेवाः पत्रकारतय् प्रतिनिधित्व यानाः नेपाल पत्रकार महासंघ, आदिवासी जनजाति पत्रकार महासंघ गन नं दबू थ्यनी अन झीगु प्रस्तुति नं बल्लायेमाः । उकिया लागिं दबू दुने हे अभ्यास बांलाक जुइमाः । माःगु प्रक्रिया लीत नुगः स्यायेमज्यू ।
दक्कले लिपा नेवाः पत्रकार राष्ट्रिय दबूयात न्ह्यःने यंकेगु नितिं सकल नेवाः पत्रकार छधी जुइमा । वैचारिक मतभेद दयाच्वनी । व हे मतभेदय् हे वैचारिक द्वन्द नं न्ह्यानां तुं च्वनी । थुकिं पिदनीगु रचनात्मक बिचालं हे संस्थायात बल्लाकायंकी । सकलें नेवाः पत्रकारत छधी जुयाः न्ह्याःवने, सकलसित भिंतुना ।
