नेवाः पत्रकार राष्ट्रिय दबूया यल जिल्लाया ग्वसालय् जलय् (हरिसिद्धि) पर्यटन प्रबद्र्धन बिषय छगु सहलह जुगु ज्याझ्वः जुगु दु।

उगु ज्याझ्वलय् मूपाहाँ दबूया केन्द्रिया बरिष्ठ उपाध्यक्ष नृपेन्द्रलाल श्रेष्ठं जलय् सांस्कृतिक ख्यलं पर्यटन प्रबद्र्धन यायेफइ धका धयादीगु खः। अथेहे उगु ज्याझ्वलय् पुलापि कार्यसमितिया दुजःपिन्त सुभाय् पौ व न्हुपि दुजःपि श्रृजना दुवाल, गुणराज शाक्य, व ईना महर्जनयात दसिपौं लःल्हानादीगु खः।

यल महानगरपालि २८ या वडाध्यक्ष बीरेन्द्र महर्जन व २९ वडाध्यक्ष गणेशकुमार महर्जनं जलयाःगु म्हसिका कथं डकुमेन्ट्री याकन हे पिकायेगु व जलय् दुनेया सांस्कृतिक जात्रा दुगु क्यालेण्डर थ्व हे ९ गते न्हुदँ कुन्हु पितब्वज्या यायेगु जानकारी बियादीगु खः। जलय् दुनेया सांस्कृतिक जात्राया प्रचार यायेत पत्रकार दबू न ग्वाहालि याइगु भलसा न कयादीगु खः।

दबूया अध्यक्ष मञ्जु बज्राचार्यया सभाध्यक्षय् जुगु उगु ज्याझ्वलय् सुुभाय् बि.के. जल्मि बियादीगु खःसा दबूया केन्द्रिय उपाध्यक्ष रचना श्रेष्ठ, महासचिव सुनील महर्जन, कोषध्यक्ष सुरेन्द्रभत्त श्रेष्ठ, यल जिल्लाया निवर्तमान अध्यक्ष सागर महर्जनपिनिगु न उपस्थिति दुगु खः।

पत्रकार दबूया यलया जिल्लाया सचिव पूर्णिमा शाक्यं न्ह्याकादीगु उगु ज्याझ्वलय् कोषाध्यक्ष कल्पना महर्जनं जलय् पर्यटन प्रबद्र्धन सम्भावना दुगु बिषय बिचाः न्ह्यब्बयादीगु खः।

Categorized in राष्ट्रिय