पत्रकार महासंघपाखें स्वंगूगु चरणया आन्दोलनया घोषणा
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
नेपाल पत्रकार महांघपाखें सरकारं संसदय् दर्ता याःगु मिडिया काउन्सिल विधेयक लित कायेत माग यासें स्वंगूगु चरणया आन्दोलनया घोषणा याःगु दु ।
थौ मंगलवाः येँय् दुपिं केन्द्रीय दुजःपिनिगु मुँज्यां असार ३ गते निसें ३० गतेतक स्वंगूगु आन्दोलनया घोषणा याःगु खः ।
स्वंगूगु चरणया आन्दोलनय् प्रेस स्वतन्त्रताया पक्षय् ल्हाःचिं अभियाननिसें सिट्ठी जुलुस व सभा यायेगुतकया ज्याझ्वः दु ।
महासंघं असार ३गते प्रेस स्वतन्त्रताया पक्षय् ल्हाःचिं मुंकेगु, ६ गते उगु ल्हाःचिं जिल्ला प्रशासन ज्याकूपाखें प्रधानमन्त्रीयात छ्वयेगु, १० गते मिडिया काउन्सिल विधेयक विरुद्ध कार्टुन ब्वज्या यायेगु ज्याझ्वः घोषणा याःगु दु ।
अथे हे असार १५ गते फुक्क जिल्ला कचापाखें थःथःगु क्षेत्रपाखें निर्वाचित संघीय व प्रदेशसभाया सांसदपिन्त एसएमएस मार्फत सन्देश छ्वयाः ध्यानाकर्षण याकेगु, असार २० गते प्रेस स्वतन्त्रता सभा यायेगु, असार २५ गते न्हिनसिया १२ताः इलय् लालटिन जुलुस पिथनेगु व असार ३० गते देय्न्यंक सिट्ठी जुलुस व सभा यायेगु महासंघं न्ह्यथंगु दु ।
महासंघं प्रेस जगतया जायज माग न्ह्यब्वयाः आन्दोलन याःगु इलय् पत्रकार महासंघ व समग्र सञ्चार ख्यःयात सरकारं उपेक्षा याःगु धासें विरोध याःगु दु । मिडिया काउन्सिल विधेयकय् तयातःगु प्रावधानं सञ्चार क्षेत्रया नियमन यायेगु मजूसे नियन्त्रण यायेगु प्रष्ट जूगु धासें महासंघं थुकियात लित कयाः सरोकारवालालिसे सहलह यानाः समस्या ज्यंकेत इनाप याःगु दु ।
प्रेस स्वतन्त्रता विरोधी मिडिया काउन्सिल विधेयक लित मकाःतलय् अझ सशक्त आन्दोलन न्ह्याकाच्वनेगु नं महासंघं क्वःछ्यूगु दु ।
Categorized in राष्ट्रिय
