२०७७ माघ ५, सोमबार

पन्जाबं दिल्लीयात न्यागु विकेट त्याकल

रमित | कौलाथ्व पंचमी ११४०,कार्तिक ५ बुधवाः

किंग्स इलाभेन पन्जाबं आईपीएल क्रिकेटय् म्हिगः जूगु कासाय् लगातार त्याकूगु दु। पन्जाबं दुबईलय् जूया च्वंगु कासाय् दिल्ली क्यापिटल्सयात न्यागु विकेट बूकुगु खः।
 
पन्जाबं दिल्ली न्ह्यब्वःगु १६५ रनया लक्ष्य छगू ओभर ल्यःदनिगु इलय् त्याकूगु खः। पन्जाबया टप स्कोरर निकोलस पुरनं ५३ रनया योगदान याःगु खः।
 
दिल्लीया लागि शिखर धवनं नटआउट १०६ रन दयेका म्यान अफ द म्याच  जूगु खः।
 
आईपीएलया जारी १३ क्वःगु संस्करणय पन्जाब थ्व नाप प्यकः त्यागु खःसा दिल्लीं थुगु कासाय् स्वक्वः बूगु दु।
 
पन्जाबया कप्तान केएल राहुल १५ रनय् न्हापागु विकट कथं आउट जूगु खः। वयात स्वगू ओभरय् दिल्लीया अक्षर पटेलं आउट याःगु खः।
 
स्वःगु थासय् ब्याटिङयाम्ह क्रिस गेल २९ रनय् आउट जूगु खः। वयात खुगु ओभरय् रविचन्द्र आश्विनं बोल्ड याःगु खः। उगु हे ओभरय् मयंक अग्रवाल ५ रनय् रनआउट जूगु खः। पन्जाबया लागि निकोलस पुरनल २८ बलय् ५३ रन, ग्लेन म्याक्सवेल ३२ रन, दीपक होडा १५ व जिम्मी निशम १० रन नटआउट जुगु खः। बलिङय् कागिसो रबाडां २ विकेट काःगु खः।
 
टस त्याका न्हापा ब्याटिङ यासे दिल्लीं शिखर धवनया शतकया ग्वाहालि ५ विकेटय् १६४ रन दयेकूगु खः। धवनं ६१ बलय् १०६ रन दयकूगु खः। आईपीएलय् थुगु सिजनय् थ्व लगातार निगुगु शतक खः।
 
पन्जाब विरुद्धया कासाय् दिल्लीया ओपनर पृथ्वी शा ७ रनय् आउट जुगु खःसा श्रेयस अय्यर व ऋषभ पन्तं १४–१४ रन दयेकूगु खः।
 
पन्जाबया लागि मोहम्मद शामी दकलय् अप्वो सफल बलर जुल। २८ रन बिया निगु विकेट काःगु खः। ग्लेन म्याक्सवेल, जेम्श निशम व मुरुगन आश्विनं छगु छगु विकेट काःगु खः।
Categorized in कासा