पपुवा न्यूगिनी विरुद्धया छगू दिवसीय क्रिकेटय् नेपाःया रोमाञ्चक जित
गुंलागा चतुर्दशी ११४१, भाद्र २२ मंगलबाः
नेपाल राष्ट्रिय क्रिकेट टोलीं पपुवा न्यूगिनी पीएनजी विरुद्धया छगू दिवसीय क्रिकेटय् रोमाञ्चक जित हासिल याःगु दु ।
ओमान अल अमिरात क्रिकेट मैदानय् जूगु न्हापांगे कासाय् नेपालं २गू विकेटं त्याकेत ताः लाःगु खः । सच्छि व ३५गू रनया सामान्य हाथ्या चूलागु नेपालं ८२गू रनं दयेकूगुबले हे ७गू विकेट वंगु खः । तर रोहति पौडेल व सोमपाल कामी दथुया ८गूगु विकेटया नितिं ५२गू रनया साझेदारी जूसेंली नेपालं ३९गू ओभर ३गू बलय् ८गू विकेट छ्वया जित हासिल याःगु खः । रोहितं ४१गू व सोमपालं अविजित २२गू रन दय्कूगु खः । अथेहे डेब्यू कासामी आशिफ शेखं ३०गू रन तंगु खः ।
थ्वयान्ह्यः नेपालं उत्कृष्ट बलिङ याना पीएनजी ३३गू ओभरय् अलआउट जुया सच्छि व ३४गू रनय् लिकुंकूगु खः । लिगा सिआकाया सर्वाधिक ३९गू रन दयेकूगु न्यूगिनीयात सन्दिप लामिछानें ४गू विकेट काःगु खः । डेब्यू कासामी विक्रम सोब व कुशल मल्लं २गू–२गू विकेट काल ।
थुगु कासां विक्रम, आशिफ व कुशल भुर्तेलं छगू दिवसीय कासाय् डेब्यू याःगु खः । आसीसी विश्वकप क्रिकेट लिग डिभिजन–२ अन्तर्गत त्रिकोणात्मक श्रृंखलाया तयारीया नितिं ओमानय् दूगु नेपालं पीएनजीलिसें निगू छगू दिवसीय क्रिकेट श्रृंखला म्हिताच्वंगु दु । निगूगु कासा शुक्रबाः जुई ।
नेपाल, ओमा व अमेरिका दुथ्यागु क्रिकोणात्मक श्रृंखला भदौ २८ गतेनिसें न्ह्याई ।
