परम्परागत धाः बाजा प्रशिक्षण क्वचाल
नृपेन्द्रलाल श्रेष्ठ | गुंलाथ्व चर्तुदशी ११३८ ( अगष्ट २५ २०१८ )
ताम्रकार समाज युवा तथा खेलकुद उपसमितिया ग्वसालय् जुगु नी ला यकं परम्परागत धाः बाजा प्रशिक्षण ज्याझ्वः क्वचाःगु दु । यल महानगरपालिका संस्कृति, सम्पदा, पुरातत्व संरक्षण केन्द्रया ग्वहालि जुगु खः ।
उगु प्रशिक्षण समापन ज्याझ्वःया मूपाँहा यल २४ नं. वडा अध्यक्ष नाप महानगरपालिकाया सामाजिक बिकास समितिया संयोजक दिनेश कार्की, वडा नं. ४ या अध्यक्ष नारायण के.सी., वडा नं. १९ अध्यक्ष विनोद ताम्रकार, केन्द्रया अधिकृत सबिना महर्जन पिन्स ब्बति कयादीगु खः ।
ज्याझ्वःया मूपाँहा कार्कीें सम्पदा, संस्कृति, संरक्षण यायेत आ ल्याम्हपि न्ह्यने वयेमाःगु खँय् बःबिया दीगु खः । ज्याझ्वःया सभानायः नाप समाजया अध्यक्ष रविन्द्रराज ताम्रकारं थुगु प्रशिक्षण ज्याझ्वलं आत्म संतुष्टी बिगु दु धयादीसे तना वनेत्यःगु परम्परागत धाः बाजा ल्याय्म्ह तयेत आकर्षण यायेत थुगु ज्याझ्वः जुगु खँ कनादीगु खः
स्यनामिपिं राम ताम्रकार, सन ताम्रकार व बिजु राजकर्णिकारयात मूपाँहा पाखें मतिनाया चिं लःल्हानादीगु खःसा ब्बति कयादीपिन्त दसीपौ लःल्हानादगिु खः ।
थुगु ज्याझ्वलय् च्यादँ निसे पीदँ तकया मनू तयेगु ब्बति दुगु खः ।
