परियत्ति शिक्षायात मनपाया ग्वाहालि
लहनान्युज | पोहेलाथ्व एकादशी ११४० (जनवरी ६ २०२०)
येँ महानगरपालिकां बौद्ध परियत्ति शिक्षा प्रवद्र्धनया लागिं आर्थिक ग्वाहालि लःल्हाःगु दु । आइतवाः येँया विश्वशान्ति विहारय् जूगु जूगु छगू ज्याझ्वःया दथुइ येँ महानगरपालिकाया मेयर भाजु विद्यासुन्दरं परियत्ति शिक्षा सञ्चालन याना वयाच्वंगु निकाय अखिल नेपाल भिक्षु महासंघया नायः भिक्षु मैत्री महास्थविरयात २३ लाख ६५ हजार तकाया चेक लःल्हानादिल ।
ज्याझ्वलय् न्ववासें मेयर शाक्यं भगवान बुद्धया आधारभूत परियत्ति शिक्षायात येँ महानगरपालिका अन्तर्गत लाःगु स्कूलय् नं नैतिक शिक्षाया रुपय् समावेश याना यंकेमाःगु खँय् बः बियादिल । परियत्ति शिक्षायात बियागु थ्व ग्वाहालि शुरुवात जक खः धासें वय्कलं लिपा थुकियात बढे यानाः यंके फइगु खँ नं कनादिल ।
अखिल नेपाल भिक्षु महासंघया नायः भिक्षु मैत्री महास्थविरया सभापतित्वय् जूगु उगु ज्याझ्वलय् अनगारिका ञाणवति गुरुमांनं परियत्ति शिक्षाया महत्व बारे कनाबिज्याःगु खःसा परियत्ति शिक्षाया परीक्षा नियन्त्रक भिक्षु वोधिज्ञान महास्थविरं मनपाया थ्व ग्वाहालिपाखें परियत्ति शिक्षाया विस्तारय् तःधंगु ग्वाहालि जुइगु खँ कनादिल ।
थौंकन्हय् नेपाःन्यंकं २२ गू जिल्लाय् ११४ गू परियत्ति शिक्षा केन्द्र सञ्चालन जुयाच्वंगु दुसा दँय् न्याद्वः परिक्षार्थीपिंसं थुकिया परीक्षा बीगु यानाच्वंगु दु । कपिलवस्तु जिल्लाया देवदह नगरपालिकां थौंकन्ह थःगु नगर अन्तर्गत लाःगु फुक्क हे स्कूलय् ६, ७ व ८ तगिमय् नैतिक शिक्षाया रुपय् परियत्ति शिक्षा ब्वंकेगु यानाच्वंगु दु ।
