परिषदया झिंन्याक्वःगु दँमुँज्या
लहनान्युज | कौलागा पंचमी ११३९ (अक्टुवर १८ २०१९)
नेपालभाषा परिषदया झिंन्याक्वःगु दँमुँज्या छगु ज्याझ्वः दथुइ प्रतिभा समाज कुपण्डोलय् क्वचाःगु दु ।
परिषदया नायः प्रा. सुवर्ण शाक्यया सभाधक्ष्यताय् जुगु उगु ज्याझ्वलय् ध्रुब मधिकःमिं लसकुस नापं वार्षिक प्रतिवेदन न्ह्यब्वयादिगु खःसा दांभरिं मंगला कारंजितं आर्थिक प्रतिवेदन
न्ह्यब्वयादीगु खः ।
ज्याझ्वलय् नुगःखँ तयेगु झ्वलय् ७० दँ पुलांगु संस्थाय् थौंतक्कनं ७० म्ह जक जः दुगुलिं भाषा साहित्यया विकासया नितिं धिसिलाक्क पलाःछिइपि न्हूपिं जः दुथ्याकेमाःगुलिइ मंगला कारंजितं बः बियादिल ।
अथेहे ‘दुने क्वात्तु मजुइकं पिनें प्रचार जुयां शक्ति सञ्चय जुइमखु’ धासें दँय्दसं सांस्कृतिक अन्यौलता ब्वलनाच्वंगुलिं नेवाः तिथिपौ (पात्र) दयेकाः नेवाः एकता यायेमाःगु धका परिषदया नायः शाक्यं धयादिगु खः । ज्याझ्वः बिमलप्रभा बज्राचार्य न्ह्याकादीग खः ।
बुखँ : अमिर मैया रञ्जित
किपा : नेवाः सूचना केन्द्र
