पहिचान आधारित संघीय गठवन्धनया मुन्ज्या
लहनान्युज | थिंलागा द्धितीया ११३९ (दिसेम्वर २४ २०१८)
![](https://www.lahananews.com/sites/default/files/NRP%201.jpg)
पहिचानय् आधारित संघीय गठवन्धनय् आबद्ध ७ गू जनजाति पार्टीया मंकाः मुँज्या क्वचाःगु दु । पार्टीया भावी रणनीतियात कयाः वृहत सहलह जूगु उगु मुँज्याय् विशेष यानाः जनजाति पार्टीत एकता वद्ध जुया वने माःगुली बःब्यूगु दु ।
उगु मुँज्यां नकतिनि क्वचाःगु ११ गू थी थी पार्टीया मंकाः पुचःया कोण सभा व आम सभायात कयाः नं समीक्षा याःगु खः । उगु मुँज्याय् हाकनं छगू चिंयात कयाः वइगु चुनावय् व्वति कायेगु खँय् हाकनं वहस जुल ।
अथे हे मुँज्याय् संविधान परिमार्जन याय्त सरकारयात दवाव बीगु बारे नं व्याक्कं सहलह जुल ।
नेपाः पार्टीया नायः डा. विजयप्रकाश सैंजुया अध्यक्षताय् न्ह्याःगु उगु मुँज्याय् खम्वुवान पार्टीया नायः पूर्व सभासद आर. के. खम्वु, लिम्वुवान पार्टीया नायः कुमार लिंगदेन मिराक, आदिवासी जनजातिया नायः बुद्धराज स्यांगतान, खसान संघर्ष समितीया संयोजक पे्रम बहादुर खाति, पुलांम्हमन्त्रीलिसें लोकतान्त्रिक पार्टीया वरिष्ठ नेता शिवलाल थापामगर, नेपाः पार्टीया केन्द्रीय दुजः ज्ञानेन्द्र लामालिसेंया नेतापिनिगु उपस्थित दुगु खः ।
उगु मुँज्यां भानुराम थारुया न्हूगु नेपाल लोकतान्त्रिक पार्टीयात नं गठवन्धनय् दुथ्याकेगु निर्णयजुल ।
थुगु गठवन्धनं याकनं हे बृहत आमसभाया तयारी यायेगु जानकारी नेपाः राष्ट्रिय पार्टीया नायः डा. विजयप्रकाश सैंजुं लहनान्युजयात जानकारी बियादिल ।