२०८० चैत्र १५, बिहिबार

पहिचान मब्यूसा सांसद शाक्यद्वय राजीनामा बीगु मनस्थितीइ

विकाश | पोहेंलाथ्व एकादशी ११४०

सत्तारुढ दल नेपाल कम्यूनिष्ट पार्टी (नेकपा)पाखें प्रदेश ३ या सांसद डा. अजयक्रान्ती शाक्य व राजेश शाक्य राजीनामा बीगु मनस्थितीइ थ्यंगु सीदुगु दु । प्रदेश ३ या नामाकरण सम्वन्धय् स्थानीय भूगोल व जनताया पहिचानया क्वत्यलावन धाःसा राजीनामा बीगु मनस्थितीइ थ्यंगु श्रोतं धाःगु दु ।
 
हेटौंडाय् न्ह्यानाच्वंगु संसदीय दलया वैठकय् सांसद डा. अजयक्रान्ती शाक्य व राजेश शाक्यं सकसिगु भावना व पहिचान कःघानाच्वंगु धासें प्रदेश ३ या नामाकरणय् नेपालमण्डल प्रस्तावयात न्ह्यःने यंकेमाःगु अडान कयादीगु खः । वंगु १८ गतेनिसें हेटौंडाय् न्ह्यानाच्वंगु संसदीय दलया वैठकय् थःपिन्सं दर्ता याकेधुनागु प्रस्ताव ‘नेपालमण्डल’ यात प्रक्रियाय् यंकाः सहलह व मतदान याकेमाःगु खँ सांसद शाक्यद्वयं तयादीगु खः ।
 
तर वैठकय् सहभागी गुलिसिनं पार्टीया सचिवालय वैठकं बागमती नां पारित यायेधुंकूगु अवस्थाय् मेगु नामय् सहलह यानाच्वनेमाःगु धयाच्वंगु नं श्रोतं जानकारी ब्यूगु दु । पार्टीया सचिवालय वैठकया निर्णयया नामय् दर्ता जुइधुंकूगु प्रस्तावय् सहलह मयाःसे ऐतहासिक पहिचानयात हुइगु कुतः जूसा सांसद शाक्यद्वय राजीनामा बीगु मनस्थितीतक्क थ्यंगु नं श्रोतं कंगु दु ।
 
थ्व सम्वन्धय् सांसद शाक्यद्वययात न्यनाबलय् वय्कःपिन्सं नेपालमण्डल नामं प्रदेश ३ या सकसिगु भावना व पहिचानयात कःघाइगु धासें थःपिन्सं पहिचानया लडाईँ न्ह्याकाच्वनेगु धयादिल ।
 
सांसदद्वय शाक्यं न्ह्यानाच्वंगु नेकपा संसदीय दलया वैठकय् पार्टीं गनं दर्ता हे मजुइक प्रदेशया नांया खँय् व्हीप जारी यायेमज्यूगु नं धयादिल ।
 
प्रदेश ३ या नामाकरणया नितिं सांसद डा.शाक्य व वसन्त मानन्धरं थ्वयां न्ह्यः हे प्रदेश ३या सभामुख सानु श्रेष्ठमार्फत संसद सचिवालयस ‘नेपालमण्डल’ नांया प्रस्ताव दर्ता यानादीधुंकूगु दु । उगु प्रस्तावय् सांसदपिं राजेश शाक्यलिसें केशव स्थापित, ज्ञानेन्द्र शाक्य, राजकाजी महर्जन, प्रकाश श्रेष्ठ, उर्मिला व सरस्वती वाटीं समर्थन यानादीगु खः । तर लिपांगु इलय् वयाः नेकपा सचिवालय वैठकं प्रदेशया नां वागमती तयेगु निर्णय यासें उकी समर्थन यायेत व्हीप जारी याःगु खः ।
 
‘नेपालमण्डल नामय् राष्ट्रया हे नां नं कःघानाच्वंगु दुसा थुगु नामं थनया ऐतिहासिक पहिचानया नं प्रतिनिधित्व यानाच्वंगु दु, अथेजूगुलिं थुकिं सकलसिगु भावना कःघाइ ।’ शाक्यद्वया धापू खः ।
 
‘दर्ता जुइधुंकूगु प्रस्तावय् सहलह तकं मयायेगु, जनताया भावनाया कदर मजुइगु खःसा थुकिं जनमतया अपमान जूवनेफु’ शाक्यद्वयं धयादिल । थःपिनिगु सःयात संसदतक्क थ्यंकी धइगु विश्वासं जनतां मत ब्यूगु खः’ शाक्यद्वयं तनादिल ।
 
सांसद डा. शाक्य व मानन्धरं दर्ता यानादीगु प्रस्तावय् प्रदेश ३ या १३ जिल्लामध्ये चितवन जिल्लाबाहेक मेगु दक्वं नेपालमण्डलय् हे लाःगु धयातःगु दु । अझ यक्ष मल्लया पालय् चितवन नं नेपालमण्डल अन्तर्गत हे लाःगु खनेदुगु नं प्रस्तावय् न्ह्यथनातःगु दु । 
 
‘लिच्छवीकालया अभिलेखय् न्ह्यथनातःगु कथं नेपालमण्डलया फैलावट पूर्वय् कुशेश्वर (सुनकोसी, सिन्धुली), पश्चिमय् केवलपुर (धादिङ्ग), उत्तरय् रसुवापारि केरुङ व दक्षिणय् तिस्तुङ (मकवानपुर) तक्क दुगु खः । अथेजूगुलिं वर्तमान प्रदेश नं. ३ धयागु ऐतिहासिकता व भूगोलया ल्याखं नं प्राचिन नेपालमण्डल हे खः’, शाक्यद्वयया धापू खः ।
Categorized in राजनीति